वितरक एम. बी. सन्सने उपलब्ध केला आंबा : अर्धा डझनाला तब्बल 3600 रुपये बोली
बेळगाव : नूतन वर्षाच्या सुरुवातीला जानेवारी महिन्यातच बुधवारी आंब्यांचा राजा हापूस बेळगावात दाखल झाला आहे. आंब्यांचे अधिकृत वितरक एम. बी. देसाई अँड सन्सने हा पहिला आंबा उपलब्ध केला आहे. कोकणातील बागायतदार श्रेयस नंदू माणगावकर यांच्याकडून सदर आंबा दाखल झाला आहे. कोकणातील हापूस आंबा दाखल होताच देसाई अँड सन्सतर्फे पहिली लिलाव प्रक्रियाही पार पडली व महमूदखान खानजादे यांनी लिलावात तो खरेदी केला. त्यामध्ये दोन प्रकारच्या हापूस आंब्यांचा लिलाव झाला. अर्ध्या डझनला 1000 रुपयांपासून बोली लावण्यात आली. ती वाढत जाऊन अखेर 3500 आणि 3600 रुपयांना हापूस आंब्याची होलसेल खरेदी झाली. या खरेदीचे उपस्थित व्यापाऱ्यांकडून टाळ्यांच्या गजरात स्वागत करण्यात आले. एम. बी. देसाई अँड सन्सचे संचालक संदीप देसाई यांनी हापूस आंब्याचे पूजन केले. त्यानंतर लिलाव प्रक्रिया पार पाडण्यात आली. बेळगावमध्ये दरवर्षी 15 फेब्रुवारीपासून आंब्यांची मोठ्या प्रमाणात आवक सुरू होते. मात्र यावर्षी जानेवारी महिन्याच्या शेवटच्या आठवड्यातच आंबा दाखल झाला असून तो बेळगावकरांना चाखायला मिळणार आहे. फेब्रुवारी महिन्यापासून मोठ्या प्रमाणात आवक वाढणार आहे, अशी माहिती उपलब्ध झाली आहे.
