पणजी प्रतिनिधी
राज्यपाल पीएस श्रीधरन पिल्लई यांनी गोमंतकीयांना विशेषत: सर्व स्वातंत्र्यसैनिक बंधू-भगिनींना 18 जून रोजी गोवा क्रांतिदिनाच्या शुभप्रसंगी हार्दिक शुभेच्छा दिल्या आहेत.
18 जून गोवा क्रांतिदिन हा कायमस्वरूपी गोव्याच्या इतिहासाचा एक महत्त्वाचा भाग आहे. 18 जून 1946 रोजी मडगाव येथे डॉ. राम मनोहर लोहिया आणि डॉ. ज्युलियो मिनेझिस यांनी पोर्तुगीज राजवटीविऊद्ध चळवळ सुरू केली. मडगाव येथे डॉ. राम मनोहर लोहिया यांनी पेटविलेली ठिणगी गोमंतकीयांच्या हृदयात मोठ्या ज्वाळांमध्ये बदलली. ही दोन व्यक्ती क्रांती सुरू करून गोव्याचे हिरावून घेतलेले नागरी स्वातंत्र्य मिळविण्यास जबाबदार ठरले. त्यांनी 18 जून 1946 रोजी मडगाव येथे पोर्तुगीज राजवटीविरूध्द स्वातंत्र्याची मशाल पेटविली आणि त्यामुळे 19 डिसेंबर 1961 रोजी गोवा मुक्त झाला, असे राज्यपाल संदेशात म्हटले आहे.
या दिवशी ज्यांनी पोर्तुगीज राजवटीतून गोव्याच्या मुक्तीसाठी स्वेच्छेने सहभाग घेतला त्या गोव्यातील लोकांच्या आणि देशाच्या विविध भागांतील लोकांच्या शूर लढ्याचे स्मरण आपण करतो. गोवा क्रांती चळवळ ही तेथील लोकांच्या अदम्य भावनेचा पुरावा होता, ज्यांनी दडपशाहीपुढे झुकण्यास नकार दिला आणि त्यांच्या हक्कांसाठी अथक संघर्ष केला. या खडतर प्रवासात ज्यांनी आपल्या प्राणांची आहुती दिली, ज्यांची कुटुंबे तुटली आणि अपार त्रास सहन केला अशा असंख्य वीरांना आपण आदरांजली वाहूया, त्यांचे अतूट समर्पण आणि स्वातंत्र्याच्या अढळ विश्वासाने गोव्याच्या इतिहासात नवीन पहाट घडविण्याचा मार्ग मोकळा केला. संस्मरणीय प्रसंगी, आपण गोव्याला एक आदर्श राज्य बनविण्यासाठी आणि गोव्याच्या भल्यासाठी काम करण्याची शपथ घेऊया, असे राज्यपालांनी संदेशात म्हटले आहे.
