हडलगा-खैरवाड-नंदगड बसफेरीला सुरुवात : ग्रामस्थांत समाधान

नंदगड : हडलगा गावापासून खैरवाड, नंदगडमार्गे खानापूरला बसफेरी सुरू झाली आहे. त्यामुळे हडलगा, खैरवाड, गर्बेनहट्टी येथील विद्यार्थ्यांची नंदगड, खानापूर येथे शाळेला जाण्यासाठी व नागरिकांना आपल्या कामाला जाण्यासाठी चांगली सोय झाली आहे. त्यामुळे प्रदीर्घ वर्षाच्या मागणीनंतर खानापूर बस आगाराने हडलगा बसफेरी सुरू केल्याने त्या भागातील जनतेत समाधानाचे वातावरण पसरले आहे. हडलगा गावाला आजपर्यंत बस सुविधा नव्हती. केवळ निवडणुकीच्या वेळी मतपेटी घेऊन जाण्यासाठी या गावाला बस येत होती. इतर गावाप्रमाणेच आपल्याही गावाला बससेवा असावी, असे नेहमीच येथील जनतेला वाटत होते. हडलगा गावच्या जनतेला नंदगड येथे जाण्यासाठी खैरवाडमार्गे चार किलोमीटर अंतर कापून चालत, सायकलवरून तर दुचाकीवरून जावे लागत होते. विद्यार्थ्यांना ऊन पावसात या समस्येला तोंड द्यावे लागत होते. बदलत्या काळानुसार आपल्या गावातील मुले शाळेला बसने जावीत, अशीच येथील जनतेच्या मनात संकल्पना आली. त्यानुसार खैरवाड व हडलगा गावातील काही सूज्ञ नागरिकांनी खानापूर येथील बस आगारप्रमुखांना भेटून आपली समस्या मांडली. खैरवाड, हडलगा गावातील जनतेच्या मागणीनुसार सोमवारपासून हडलगा-नंदगड-खानापूर बसफेरीला सुरुवात झाली आहे. हडलगा येथील विद्यार्थी सोमवारी खैरवाड येथील प्राथमिक शाळेत, कसबा नंदगड येथील माध्यमिक शाळेत बसने आले. शिवाय हडलगा, खैरवाड ग्रामस्थांनीही बसने नंदगडपर्यंत प्रवास केला.