वृत्तसंस्था/श्यामकेंट
16 व्या आशियाई नेमबाजी चॅम्पियनशिप स्पर्धेत गुरूवारी पुरुषांच्या 25 मी. स्टँडर्ड पिस्तुल नेमबाजी प्रकारात भारताच्या गुरप्रित सिंगने सुवर्ण तर अमनप्रित सिंगने रौप्य पदक पटकाविले. या स्पर्धेत भारताने 44 सुवर्ण, 20 रौप्य आणि 18 कांस्य अशी 82 पदकांची लयलुट केली आहे. गुरप्रित आणि अमनप्रित सिंग यांनी सांघिक 25 मी. स्टँडर्ड पिस्तुल नेमबाजी प्रकारात हर्ष गुप्ता समवेत 1709 शॉट्स नोंदवित सुवर्णपदक पटकाविले. या स्पर्धेत 50 मी. रायफल प्रोन कनिष्ठ भारतीय संघाने सुवर्णपदक तर 25 मी. स्टँडर्ड पिस्तुल सांघिक कनिष्ठांच्या विभागात भारताने सुवर्णपदक मिळविले. 37 वर्षीय गुरप्रित सिंगचे आंतरराष्ट्रीय नेमबाजी स्पर्धेतील हे पहिले वैयक्तिक सुवर्णपदक आहे. तेहरानमध्ये 12 वर्षांपूर्वी झालेल्या आशियाई
चॅम्पियनशिप स्पर्धेत गुरप्रित सिंगने कांस्यपदक घेतले होते. पुरूषांच्या 25 मी. स्टँडर्ड पिस्तुल नेमबाजी प्रकारात गुरप्रित सिंग आणि अमनप्रित सिंग यांनी समान 572 शॉट्स नोंदविले. पण इनर सर्कलमध्ये गुरप्रित सिंगने 18 शॉट्स तर अमनप्रित सिंगने 11 शॉट्स नोंदविल्याने त्यांना अनुक्रमे सुवर्ण आणि रौप्य पदक देण्यात आले. या क्रीडा प्रकारात चीनच्या लियानबोफेनने कांस्यपदक मिळविले. कनिष्ठांच्या 25 मी. स्टँडर्ड पिस्तुल नेमबाजी प्रकारात भारताच्या सुरज शर्माने रौप्य पदक तर तनिष्क नायडूने कांस्यपदक मिळविले. या क्रीडा प्रकारातील सांघिक गटामध्ये मुकेश नेलावली, सुरज शर्मा आणि तनिष्क नायडू यांनी सुवर्णपदक पटकाविले.
