न्यूझीलंडचा टी-20 वर्ल्डकप संघ जाहीर
ख्राईस्टचर्च / वृत्तसंस्था
आगामी टी-20 वर्ल्डकपसाठी किवीज संघाने 15 सदस्यीय संघ जाहीर केला असून अव्वल फलंदाज मार्टिन गप्टील यंदा विक्रमी सातवा टी-20 वर्ल्डकप खेळण्यासाठी सज्ज झाला आहे. ही स्पर्धा दि. 16 ऑक्टोबरपासून ऑस्ट्रेलियात खेळवली जाणार आहे.
फिन ऍलन व मायकल ब्रेसवेल प्रथमच वरिष्ठ स्तरावरील वर्ल्डकप खेळणार असून लॉकी फर्ग्युसन जलद गोलंदाज काईल जेमिसनची जागा घेईल. मागील वर्ल्डकप खेळलेले टॉड ऍसल व टीम सेफर्ट यंदा बाहेर फेकले गेले आहेत.
अलीकडेच, मध्यवर्ती करार लाभलेले ट्रेंट बोल्ट व जिम्मी नीशम वर्ल्डकप संघात समाविष्ट आहेत. बोल्ट, फर्ग्युसन, टीम साऊदी व ऍडम मिल्नेसारखे तडफदार गोलंदाज संघात असल्याने गोलंदाजी लाईनअप मजबूत असेल. फिरकीची आघाडी ईश सोधीवर असेल. त्याला ब्रेसवेल व मिशेल सॅन्टनरची साथ लाभेल.
ग्लेन फिलीप्स, डॅरेल मिशेल, सॅन्टनर, ब्रेसवेल व नीशम अष्टपैलू योगदान देण्यासाठी महत्त्वाकांक्षी असतील. विल्यम्सनने आयसीसी टी-20 वर्ल्डकपमध्ये संघाचे नेतृत्व भूषवण्याची ही तिसरी वेळ असेल. न्यूझीलंडचा संघ आपल्या वर्ल्डकप मोहिमेला दि. 22 ऑक्टोबर रोजी ऑस्ट्रेलियाविरुद्ध लढतीने सुरुवात करेल.
न्यूझीलंड संघ ः केन विल्यम्सन (कर्णधार), टीम साऊदी, ईश सोधी, मिशेल सॅन्टनर, ग्लेन फिलीप्स, जिम्मी नीशम, डॅरेल मिशेल, ऍडम मिल्ने, मार्टिन गप्टील, लॅशलन फर्ग्युसन, डेव्हॉन कॉनवे, मार्क चॅपमन, मायकल ब्रेसवेल, ट्रेंट बोल्ट, फिन ऍलन.
