दहशतवादी हॅप्पी पासियानने स्वीकारली जबाबदारी
वृत्तसंस्था/अमृतसर
अमृतसरमध्ये बुधवारी मध्यरात्रीच्या सुमारास एका अज्ञात व्यक्तीने जिल्हा देहातीमधील मजिठा पोलीस ठाण्यात हँडग्रेनेड फेकले. हा ग्रेनेड पोलीस ठाण्याच्या आत मोकळ्या जागेत फेकल्यानंतर मोठा स्फोट झाला. पोलिसांनी तात्काळ सावधानता बाळगत पोलीस ठाण्याचे दरवाजे बंद केले. मात्र, या हल्ल्यात खिडक्यांच्या काचा फुटल्याचे निदर्शनास आले आहे. दरम्यान, हॅप्पी पासियान या दहशतवाद्याने हँडग्रेनेड हल्ल्याची जबाबदारी स्वीकारली आहे. त्यानेच काही दिवसांपूर्वी अजनाळा पोलीस स्थानकाबाहेर आयईडी लावून उडवण्याचा कट रचला होता. स्फोटाचा आवाज ऐकून आजूबाजूचे लोकही घटनास्थळी जमा झाले. माहिती मिळताच एसपी चरणजीत सिंग, डीआयजी सतींदर सिंग यांनी तात्काळ घटनास्थळी पोहोचून तपास सुरू केला. मिळालेल्या माहितीनुसार, बुधवारी रात्री अकराच्या सुमारास मजिठा पोलीस ठाण्यात पोलीस ड्युटीवर होते. याचदरम्यान अज्ञात व्यक्तीने बाहेरून हँडग्रेनेड फेकले.
सहा दिवसांत दुसरा स्फोट
सहा दिवसांपूर्वी जिह्यातील नागरी भागातील गुरबक्ष नगर येथील बंद चौकीवर हँडग्रेनेड फेकून असाच स्फोट घडवून आणला होता. यापूर्वी 23-24 नोव्हेंबरच्या रात्री अजनाळा पोलीस ठाण्याच्या बाहेर आयईडी लावून विमान उडवण्याचा कट उघड झाला होता. गेल्या पंधरा दिवसांत तीन घटना घडल्या आहेत. आतापर्यंत या घटनांमागील आरोपी कोण याचा शोध पोलिसांना लावता आलेला नाही. तसेच कोणाला अटकही करण्यात आलेली नाही.
सुखबीर बादल यांच्यावरील हल्ल्यानंतरची घटना
बुधवारी सकाळी खलिस्तानी दहशतवादी नारायण च•ा याने श्री हरमंदिर साहिब येथे कार्यरत असलेले शिरोमणी अकाली दलाचे प्रमुख सुखबीर बादल यांच्यावर गोळीबार करण्याचा प्रयत्न केला होता. सुरक्षा जवानांच्या तत्परतेमुळे हा हल्ला हाणून पाडण्यात आला. पोलिसांनी आरोपीला अटक केली. सुखबीर बादल यांच्यावरील हल्ल्यानंतर संपूर्ण जिल्ह्यात पोलीस सतर्क असतानाच रात्री उशिरा पोलीस ठाण्यात हँडग्रेनेडचा स्फोट झाल्याने सुरक्षेचा प्रश्न ऐरणीवर आला आहे
