शिवशौर्य यात्रेचे जुने गोवे येथे भव्य स्वागत

जुने गोवे : छत्रपती शिवाजी महाराजांचे विचार आज प्रत्येकाने आचारण्यात आणण्याची नितांत गरज आहे. आपला हिंदू धर्माचे रक्षण करण्यासाठी आपल्या मुलांना शिवरायांचे विचार व कार्य याची जाणीव दिली पाहिजे, असे प्रतिपादन कुंभारजुवे मतदारसंघाचे आमदार राजेश फळदेसाई यांनी केले. विश्व हिंदू परिषद व बजरंग दलातर्फे आयोजित छत्रपती शिवाजी महाराजांच्या  शिवशौर्य यात्रा जुने गोव्यातील हात कातरो खांब येथे दाखल झाल्यानंतर यात्रेचे आमदार फळदेसाई यांनी स्वागत केले. यावेळी प्रशांत भांडारी, शिवशौर्य यात्रेचे प्रमुख मोहन आमशेकर, उत्तर गोवा जिल्हा पंचायत अध्यक्ष सिद्धेश श्रीपाद नाईक, कुंभारजूवे मतदारसंघातील सरपंच, उपसरपंच, पंचायत सदस्य व नागरिक उपस्थित होते. योळी मोहन आमशेकर व प्रशांत भांडारी यांनीही उपस्थितांना मार्गदर्शन केले. तत्पूर्वी आमदार राजेश फळदेसाई यांच्या जुने गोवे येथील कार्यालयाजवळून मोठ्या संख्येने उपस्थित नागरिकांची ढोल ताशा च्या गजरात हात कातरो खांबा पर्यंत शिवशौर्य यात्रेचे स्वागत करण्यासाठी आमदारांच्या नेतृत्वाखाली मिरवणूक काढण्यात आली. जय भवानी, जय शिवाजी. शिवाजी महाराज की जय, जय श्री राम ह्या घोषणांनी परिसर सुमारे तासभर दणाणून गेला होता. गांधी सर्कलला वळसा घालून शिवशौर्य यात्रा पुढील प्रवासासाठी मार्गस्थ झाली.