मोदगा येथील ग्रामदेवता श्री महालक्ष्मी देवीची भव्य मिरवणूक

सांबरा : मोदगा (ता. बेळगाव) येथील ग्रामदेवता श्री महालक्ष्मी देवीच्या यात्रेला मंगळवार दि. 18 रोजी उत्साहात प्रारंभ झाला असून बुधवारी अमाप उत्साहात गावामध्ये देवीची मिरवणूक काढण्यात आली. मंगळवारी सायंकाळी सहा वाजता देवीची प्रतिष्ठापना करण्यात आली.यावेळी देवीची ओटी भरून नैवेद्य दाखवण्यात आला. त्यानंतर मध्यरात्री दोन वाजता देवीच्या(व्हन्नाट)मिरवणुकीस प्रारंभ करण्यात आला. बुधवारी दिवसभर गावामध्ये देवीचा व्हन्नाट खेळ सुरू होता. देवीचा व्हन्नाट झाल्यानंतर रात्री देवी गदगेवर विराजमान झाली.नऊ वर्षानंतर होत असलेल्या यात्रेची गावांमध्ये जय्यत तयारी करण्यात आलेली आहे. तसेच नऊ दिवस चालणाऱ्या यात्रेमध्ये विविध सांस्कृतिक कार्यक्रमांचे आयोजन करण्यात आले आहे. शुक्रवार दि. 21 ते 25 मार्चपर्यंत मानकऱ्यांच्या व गावकऱ्यांचा ओटी भरण्याचा कार्यक्रम होईल. येथील महालक्ष्मी यात्रेनिमित्त राज्य परिवहन मंडळाच्या वतीने बेळगाव ते मोदगा मार्गावर जादा बसफेऱ्या सोडण्यात आल्या आहेत. तर मारीहाळ पोलिसांनी चोख पोलीस बंदोबस्त ठेवला आहे.