गोवन्स एससी, साईराज एफसी विजयी

बेळगाव : कर्नाटक राज्य फुटबॉल संघटना मान्यताप्राप्त बेळगाव जिल्हा फुटबॉल संघटना आयोजित बीडीएफए लोकमान्य चषक वरिष्ठ फुटबॉल स्पर्धेत मंगळवारी खेळविण्यात आलेल्या सामन्यात गोवन्स एससीने फँकोचा तर साईराज एफसीने टीएफएचा पराभव करुन प्रत्येकी 2 गुण मिळविले. स्पोर्टींग प्लॅनेट मैदानावर खेळविण्यात आलेल्या वरिष्ठ फुटबॉल स्पर्धेत मंगळवारच्या पहिल्या सामन्यात गोवन्स एससीने फँकोचा 5-0 असा पराभव केला. या सामन्यात 10 व्या मिनिटाला साहिलकुमारच्या पासवर रोषण सांबरेकरने पहिला गोल केला. 14 व्या मिनिटाला स्पर्श देसाईच्या पासवर साहिलकुमारने दुसरा गोल केला. 25 व्या मिनिटाला साहिलच्या पासवर स्पर्श देसाईने तिसरा गोल करुन 3-0 ची आघाडी पहिल्या सत्रात मिळवून दिली. दुसऱ्या सत्रात 35 व 45 व्या मिनिटाला रोषण साबरेकरच्या पासवर स्पर्श देसाईने सलग 2 गोल करुन स्पर्धेतील दुसरी हॅट्ट्रीक नोंदविली. या सामन्यात फँको संघाला गोल करण्यात अपयश आले. दुसऱ्या सामन्यात साईराज एफसीने ईएफएचा 2-1 असा पराभव केला. या सामन्यात 13 व्या मिनिटाला प्रज्वल लाडच्या पासवर श्रेयस अपटेकरने गोल करुन 1-0 ची आघाडी पहिल्या सत्रात मिळवून दिली. दुसऱ्या सत्रात 38 व्या मिनिटाला टीएफएच्या समर्थ बांधेकरने गोल करुन 1-1 अशी बरोबरी करीत सामन्यात रंगत निर्माण केली. 48 व्या मिनिटाला साईराजच्या श्रेयस अपटेकरच्या पासवर प्रज्वल लाडने गोल करुन 2-1 ची आघाडी साईराजला मिळवून दिली. 60 व्या मिनिटाला टीएफएच्या समर्थ बांधेकरने गोल करण्याची नामी संधी दवडल्याने त्यांना पराभवास सामोरे जावे लागले.