पुणे / प्रतिनिधी :
मुलांमध्ये चांगल्या-वाईट स्पर्शाची जाणीव करून देणारा ‘गुड टच बॅड टच’ उपक्रम व्यापक होण्यासाठी त्याचा शालेय अभ्यासक्रमात समावेश व्हायला हवा. लैंगिक अत्याचार रोखण्यासाठी अशा उपक्रमांना शासकीय स्तरावरून पाठबळ मिळायला हवे, अशी अपेक्षा अभिनेत्री तनिशा मुखर्जी यांनी व्यक्त केली. आपल्याला जाणवणाऱ्या चुकीच्या स्पर्शाबद्दल वेळीच आवाज उठवायला हवा, अशी भूमिकाही त्यांनी या वेळी मांडली.
ग्रॅव्हिट्स फाउंडेशनच्या माध्यमातून राबविण्यात येत असलेल्या ‘गुड टच बॅड टच’ या उपक्रमाविषयी तनिशा मुखर्जी यांनी बुधवारी पुण्यात माध्यमांशी संवाद साधला. या वेळी फाउंडेशनच्या अध्यक्षा उषा काकडे उपस्थित होत्या.
मुलांशी मनमोकळा संवाद ठेवला पाहिजे
मुखर्जी म्हणाल्या, की लहान मुलांवरील, महिलांवरील अत्याचाराच्या घटना दु:खदायक आहेत. हे अत्याचार रोखण्यासाठी कायद्याच्या अंमलबजावणीसह समाजात जागृती होणेही तितकेच महत्त्वाचे आहे. अनेकदा अशा घटना दाबण्याचा प्रयत्न केला जातो. लहान मुले कधीही खोटे बोलत नाहीत. त्यामुळे पालकांनी, शिक्षकांनी मुलांशी नियमित संवाद ठेवून त्यांचे म्हणणे ऐकून घ्यायला हवे. मनमोकळा संवाद ठेवला पाहिजे. आपल्या शरीरावर आपला अधिकार असतो. त्यामुळे आपल्याला न आवडणाऱ्या स्पर्शावर प्रतिक्रिया दिली पाहिजे. विश्वासातील व्यक्तीला याबाबत अवगत करावे. या उपक्रमात मी स्वतः सहभागी होणार आहे. शाळांमधून हा उपक्रम राबवून मुलांमध्ये स्पर्शज्ञान जागृत करण्याचे महत्वाचे काम सुरु आहे. येत्या काळात ‘गुड टच व बॅड टच’ याविषयी जागृती करण्यावर मीदेखील भर देणार आहे.
