आटपाडी तालुक्यात परतीच्या प्रवासात भीषण अपघात
आटपाडी : दीपावली सुट्टीत फिरायला गेलेल्या गोमेवाडी (ता. आटपाडी) येथील मित्र मंडळींवर परतवाडा (जि. अमरावती) नजिक काळाने घाला घातला. एसटी बस आणि क्रुझर गाडीच्या समोरासमोर झालेल्या भीषण अपघातात दोघे ठार झाले. तर सातजण जखमी झाले.
मृतामध्ये गोमेवाडी येथील एक आणि कलेढोण (ता. खटाव जि. सातारा) येथील एकाचा समावेश आहे. या घटनेने गोमेवाडीसह आटपाडी तालुक्यावर शोककळा पसरली. दस्तगीर उर्फ मुन्ना मुलाणी (रा. गोमेवाडी) आणि आप्पासो अलकरी (रा. कलेढोण जि. सातारा) अशी मृताची नावे आहेत.
तर पोपट जगताप, प्रणव जगताप, सुखदेव सरगर, बिरूदेव जावीर, मुकुंद देशपांडे (रा. सर्व गोमेवाडी), सदानंद सस्ते (रा. काळेवाडी ता. आटपाडी) आणि महेश माहुरकर (रा. अमरावती) अशी जखमींची नावे आहेत.
