मुंबई : मुंबईच्या छ. शिवाजी महाराज आंतरराष्ट्रिय विमानतळावर आज कस्टम विभागाने मोठी कारवाई केली आहे. कस्टम्सच्या एअर इंटेलिजन्स युनिटने विमानतळावर 32 कोटी रुपयांचे 61 किलो सोने जप्त केले असून याप्रकरणी सात आरोपींना अटक करण्यात आली आहे. कस्टम विभागाची ही करावाई आजपर्यंतची एका दिवसात केली जाणारी सगळ्यात मोठी कारवाई मानली जात आहे. सर्व आरोपींना 14 दिवसांची न्यायालयीन कोठडी सुनावण्यात आली आहे.
या सात आरोपीमध्ये दोन महिलांचा समावेश असून सर्वजण कतार एअरवेजच्या विमानाने मुंबईत आले होते. त्यांना भारतात सोने आणण्यासाठी पैशाचे आमिष दाखवण्यात आले होते असे प्राथिमक चौकशीत आढळले आहे. त्यांना भारतातील सीमाशुल्क कायद्याबाबत माहिती नसल्याने हे सर्व जण एवढं सोनं घेऊन आले आहेत. प्रवाशांनी घातलेल्या जीन्सच्या पँटच्या बेल्टमध्ये सोने अत्यंत कल्पकतेने लपवले असल्याचे दिसून आल्याचे अधिकाऱ्यांनी सांगितले.
