हिंडलगा कारागृहातील कैद्यांना शेळी पालनाचे धडे

बेळगाव : हिंडलगा मध्यवर्ती कारागृहातील कैद्यांसाठी शेळी पालन प्रशिक्षण शिबिर आयोजिण्यात आले होते. सुमारे 75 हून अधिक कैद्यांनी या शिबिरात भाग घेतला. कारागृहाचे प्रभारी मुख्य अधीक्षक व्ही. कृष्णमूर्ती यांच्या मार्गदर्शनाखाली आयोजित करण्यात आलेल्या शिबिराच्या समारोप समारंभात मुख्य पशुवैद्याधिकारी डॉ. महादेव तेली, डॉ. सी. बी. केंगार, डॉ. अचलकर आदी उपस्थित होते. साहाय्यक अधीक्षक मल्लिकार्जुन कोण्णूर यांच्या अध्यक्षतेखाली हा कार्यक्रम झाला. दोन दिवस कैद्यांना मेंढी आणि शेळी पालनासंबंधी शिबिरात सविस्तर माहिती देण्यात आली. त्यांना प्रमाणपत्रही देण्यात आले. महांतेश होंगल व अशोक रत्नाकर यांनी शिबिराविषयी आपले अनुभव सांगितले. यावेळी जेलर राजेश धर्मट्टी, शशिकांत यादगुडे, संजय सनदी आदी उपस्थित होते. कारागृहातून सुटका झाल्यानंतर मेंढी व शेळी पालन व्यवसायात स्वत:ला गुंतवल्यास भरपूर नफा मिळतो, असे प्रशिक्षणात सांगण्यात आले.