रणकुंडयेनजीकच्या शेडमधून गोवा बनावटीची दारू जप्त

बेळगाव : बहाद्दरवाडीजवळील रणकुंडये क्रॉसनजीकच्या एका शेडवर छापा टाकून अबकारी अधिकाऱ्यांनी 50 लिटर गोवा बनावटीची दारू जप्त केली आहे. गुरुवारी सायंकाळी ही कारवाई करण्यात आली आहे. पोल्ट्री फार्मजवळच असलेल्या शेडवर अबकारी उपअधीक्षक रवी मुरगोड यांच्या मार्गदर्शनाखाली अबकारी निरीक्षक रुपा शिरोळ, उपनिरीक्षक खैरुन्निसा इनामदार व त्यांच्या सहकाऱ्यांनी छापा टाकला असता 50 लिटर गोवा बनावटीची दारू शेडमध्ये आढळून आली. यासंबंधी भरतेश शिवाजी पाटील याला अबकारी कायद्यांतर्गत नोटीस देण्यात आली आहे. गेल्या आठवड्याभरात पोलीस व अबकारी विभागाने बेळगाव परिसरात केलेली कारवाई लक्षात घेता गोवा बनावटीच्या दारूची विक्री किती प्रमाणात होते, हे लक्षात येते.