सिलेकयात समाजाला अनुसूचित जाती-जमातीतून आरक्षण द्या

बेळगाव : भटक्या व अनुसूचित जातींमध्ये मोडणाऱ्या सिलेकयात (किलेकयात) समाजाला उत्तर कर्नाटकात किलेकयात तर दक्षिण कर्नाटकात सिलेकयात म्हणून ओळखले जाते. कळसुत्री बाहुल्यांचा गावोगावी जाऊन खेळ करणारा हा समाज आरक्षणापासून दूर आहे. त्यामुळे या समाजाची कोणतीच प्रगती होऊ शकली नसल्याने या समाजाला अनुसूचित जाती जमाती प्रवर्गातून आरक्षण द्यावे, अशी मागणी कर्नाटक राज्य सिलेकयात (किलेकयात) विकास असोसिएशनतर्फे मंगळवारी राज्य सरकारकडे निवेदनाद्वारे करण्यात आली. हलगा येथे सुवर्ण विधानसौधसमोर आंदोलन करून या समाजाने आपल्या मागण्या मांडल्या. आरक्षणापासून वंचित रहावे लागत असल्याने निवेदन स्वीकारण्यासाठी आलेल्या सचिवांसमोर जोरदार नाराजी व्यक्त करण्यात आली. संपूर्ण राज्यात या समाजाचे अडीच लाखांहून अधिक नागरिक प्रत्येक जिल्ह्यामध्ये आहेत.पुरुष वर्ग कळसुत्री बाहुल्यांचा खेळ तर महिला गावोगावी जाऊन गोंदण्याचे काम करतात. यातून आलेल्या पैशांमधून कुटुंब चालवितात. त्यामुळे या समाजाला अनुसूचित जाती-जमाती प्रवर्गात समाविष्ट करण्याची मागणी करण्यात आली.