मास्टर बुक रायटर संघटनेचे आंदोलन
प्रतिनिधी/ बेळगाव
कर्नाटक राज्य राष्ट्रीय उपजीविका अभियान (संजीवनी योजना) अंतर्गत ग्राम पंचायत स्तरावर स्व-साहाय्य गट स्थापन करून सरकारच्या महत्त्वाकांक्षी योजनांवर काम करत आहोत. परंतु, या योजनेत काम करणाऱ्यांना सरकारने अद्याप कोणत्याही सुविधा दिलेल्या नाहीत. ‘समान काम समान वेतन’ याद्वारे सर्व संजीवनी योजनेतील कामगारांना वेतनवाढ देण्याच्या मागणीसाठी गुरुवारी सुवर्ण विधानसौधसमोर कर्नाटक राज्य ग्रामपंचायत स्तरावरील मास्टर बुक लिपिक संघटनेच्यावतीने आंदोलन करण्यात आले.
ग्राम पंचायत स्तरावरील युनियन चिफ बुक रायटर पदासाठी 20 हजार रुपये तर एलसीआरपीसाठी 15 हजार रुपयांची तात्काळ वाढ करावी. एमबीके व एलसीआरपी यांचे वेतन थेट सरकारद्वारे जमा करण्यात यावे. वेतनासह रजा मंजूर कराव्यात, ईएसआय, पीएफच्या सुविधा उपलब्ध करून द्याव्यात, आदी मागण्या निवेदनाद्वारे करण्यात आल्या.
संघटनेच्या प्रदेशाध्यक्ष रुद्रम्मा, मुख्य सचिव कुसुमा, गुरुबसम्मा यांच्यासह उत्तर कर्नाटकातील संजीवनी योजनेंतर्गत काम करणाऱ्या महिला मोठ्या संख्येने उपस्थित होत्या.
