जीआयटीकडे हॉरिजन चषक

बेळगाव : बेंगळूर येथे झालेल्या हॉरिजन तांत्रिक महाविद्यालय आयोजित राज्यस्तरीय फुटबॉल स्पर्धेच्या अंतिम सामन्यात बेळगावच्या जीआयटी महाविद्यालयाने एनएचसीई बेंगळूर संघाचा 2-0 असा पराभव करून विजेतेपद पटकाविले. बेंगळूर येथे घेण्यात आलेल्या स्पर्धेत पहिल्या सामन्यात जीआयटीने एनएचसीके बेंगळूर संघाचा 2-0 असा पराभव केला. जीआयटीतर्फे सिद्धांत व एम. डी. कैफ यांनी प्रत्येकी 1 गोल केला. दुसऱ्या सामन्यात जीआयटीने डीएससीई बेंगळूर संघाचा 2-0 असा पराभव केला. जीआयटीतर्फे निखील नेसरीकर व सुदर्शन यांनी गोल केले. पहिल्या उपांत्यफेरीच्या सामन्यात जीआयटीने एटीआरआयए बेंगळूर संघाचा सडनडेथमध्ये 7-6 असा पराभवक केला. जीआयटीतर्फे निखील नेसरीकर, विजय, बसू, सुदर्शन, आदिल, सिद्धांत व संकेत यांनी गोल केले. अंतिम सामन्यात जीआयटीने एनएससीई संघाचा 2-0 असा पराभव करून विजेतेपद पटकाविले. या सामन्यात सिद्धांतच्या पासवर निखील नेसरीकरने 22 व्या मिनिटाला पहिला गोल केला. तर दुसऱ्या सत्रात 33 व्या मिनिटाला निखीलच्या पासवर आदिलने दुसरा गोल केला. सामन्यानंतर मान्यवरांच्या हस्ते विजेत्या संघाला चषक, प्रमाणपत्र व पदके देऊन गौरविण्यात आले. या संघात सुमीत, संकेत, विजय, दर्शन, आदिल, सुदर्शन, बसू, महमद कैफ, निखील नेसरीकर, यश, श्रीजीत, साईराज, सिद्धांत व सामी आदी खेळाडूंचा समावेश आहे. या संघाला जीआयटीचे क्रीडा संचालक आकाश मंडोळकर यांचे मार्गदर्शन लाभले आहे.