प्रतिनिधी/ बेळगाव
कोणत्याही ऋतूत कितीही अडचणी व सुख-दु:ख असो वर्तमानपत्र वेळेत पोहोचविण्याचे काम वृत्तपत्र विक्रेते करीत असतात. त्यामुळे त्यांच्या कार्याचे कौतुक होणे गरजेचे आहे. वृत्तपत्र विक्रेत्यांनी सरकारी योजनांचा लाभ घेतला पाहिजे. यासाठी सरकारदरबारी आपण प्रयत्न करणार असल्याचे प्रतिपादन सामाजिक कार्यकर्ते किरण जाधव यांनी केले. बेळगाव वृत्तपत्र विक्रेते सामाजिक व सांस्कृतिक सोसायटीच्यावतीने नुकतेच वडगाव येथील अनुसया मंगल कार्यालयात वार्षिक सर्वसाधारण बैठकीचे आयोजन करण्यात आले होते. त्यावेळी किरण जाधव अध्यक्षस्थानावरून बोलत होते.
ते पुढे म्हणाले, सरकारने असंघटित कामगारांसाठी अनेक प्रकारच्या सुविधा उपलब्ध करून दिल्या आहेत. मात्र, या योजनांचा लाभ वृत्तपत्र विक्रेते घेत नाहीत. आगामी काळात वृत्तपत्र विक्रेत्यांना या योजनांचा लाभ मिळावा, यासाठी प्रयत्न केले जाणार आहेत. शहर आणि परिसरात 300 हून अधिक वृत्तपत्र विक्रेते आहेत. या विक्रेत्यांना आरोग्य सुविधांसह इतर प्रकारच्या सुविधा मिळणे गरजेचे आहे. शहरात पत्रकार भवन उभारण्याचे काम हाती घेण्यात आले आहे. त्या ठिकाणी वृत्तपत्र विक्रेत्यांसाठी कायमस्वरुपी जागा उपलब्ध करून द्यावी अशी मागणी करावी, असे मत व्यक्त केले.
प्रारंभी, माजी राष्ट्रपती एपीजे अब्दुल कलाम यांच्या प्रतिमेला पुष्पहार अर्पण करण्यात आला. वृत्तपत्र सोसायटीचे बेळगाव जिल्हा अध्यक्ष दीपक राजगोळकर यांनी प्रास्ताविक करताना वर्षभर हाती घेतल्या जाणाऱ्या उपक्रमांची माहिती दिली. ऑल इंडिया न्यूज पेपर असोसिएशनचे सदस्य प्रताप भोसले, राजू मुचंडी, उपाध्यक्ष श्रीकांत नेवगी, सचिव राजू भोसले, खजिनदार संजय घोरपडे, सतीश नाईक आदी उपस्थित होते. यावेळी सुभाष गोरे तसेच वृत्तपत्र विक्रीसाठी आपल्या वडिलांना मदत करणाऱ्या पूजा पुजारी, श्रुती भडदे, प्रांजल शहापूरकर, निश्मिता नाईक, श्रेया इंदुलकर यांचा सत्कार करण्यात आला. महादेव पाटील यांनी आभार मानले.
