‘अवस्थी व्हर्सेस अवस्थी’मधून झळकणार
अभिनेत्री गीता बसरा पुन्हा एकदा बॉलिवूडमध्ये सक्रीय होणार आहे. ‘अवस्थी व्हर्सेस अवस्थी’ या चित्रपटातून ती प्रेक्षकांच्या भेटीला येणार आहे. निर्माता अलंकार पांडियन यांनी या चित्रपटासाठी पवन कुमार वाडेयार यांच्यासोबत भागीदारी केली आहे. पांडियन यांनी यापूर्वी कब्जा आणि विक्रांत रोना यासारखे चित्रपट निर्माण केले आहेत.
गीता बसराचे पती हरभजन सिंह यांनाही या चित्रपटाची कथा आवडली आहे. या चित्रपटातील मुख्य भूमिकेसाठी गीताने होकार दर्शविला आहे. गीता बसरा या चित्रपटात एका गृहिणीच्या भूमिकेत दिसून येणार आहे. अलंकारचा इनवनियो ओरिजिन प्रॉडक्शन आणि पवन वाडेयार मूव्हीजकडून निर्माण होणाऱ्या या चित्रपटाचे दिग्दर्शन परमव्रत चटर्जी करणार आहे. गीता बसराने बॉलिवूडमध्ये ‘दिल दिया है’ या चित्रपटाद्वारे पदार्पण केले होते. हा चित्रपट 2006 साली प्रदर्शित झाला होता. यानंतर ती अनेक हिंदी चित्रपटांमध्ये दिसून आली होती. 2015 मध्ये तिने हरभजन सिंहसोबत विवाह केला होता. यानंतर तिने हिंदी चित्रपटांपासून अंतर राखले हेते. परंतु गीता आता पुन्हा अभिनयाच्या क्षेत्रात सक्रीय झाली आहे.
