भारतासंबंधीचा एस अँड पी यांचा अंदाज : रेपो दरात कपातीची शक्यता
नवी दिल्ली :
एस अँड पी ग्लोबल रेटिंग्जने 2025-26 या आर्थिक वर्षात भारताचा जीडीपी विकासदर 6.5 टक्के राहण्याचा अंदाज वर्तवला आहे. मजबूत देशांतर्गत मागणी आणि अनुकूल मान्सून लक्षात घेऊन रेटिंग एजन्सीने हा अंदाज जाहीर केला आहे. तसेच, एस अँड पीने आशा व्यक्त केली आहे की रिझर्व्ह बँक ऑफ इंडिया (आरबीआय) चालू आर्थिक वर्षात रेपो दरात 0.25 टक्के कपात करू शकते. कारण आरबीआयने या वर्षासाठीचा महागाईचा अंदाज 3.2 टक्केपर्यंत कमी केला आहे. एप्रिल-जून तिमाहीत भारताचा जीडीपी विकासदर 7.8 टक्के होता.
‘आम्हाला अंदाज आहे की चालू आर्थिक वर्षात (31 मार्च 2026 रोजी संपलेल्या) भारताचा जीडीपी विकासदर 6.5 टक्के राहणार आहे. सामान्य मान्सून, उत्पन्न कर आणि जीएसटीमध्ये कपात आणि सरकारी गुंतवणुकीत वाढ यामुळे देशांतर्गत मागणी मजबूत राहील,’ असे एस अँड पीने त्यांच्या निवेदनात म्हटले आहे.
किमती कमी झाल्यामुळे रेपो दर कमी होणार
रेटिंग एजन्सीने असेही म्हटले आहे की अन्न आणि पेय पदार्थांच्या महागाईत (अन्न महागाई) कपात झाल्यामुळे महागाई नियंत्रणात राहण्यास मदत होईल आणि चलनविषयक धोरणात आणखी बदल होण्याची शक्यता वाढेल. म्हणूनच, भारतीय रिझर्व्ह बँक चालू आर्थिक वर्षात रेपो दरात 0.25 टक्के कपात करू शकते.
