ऑनलाईन टीम/तरुण भारत
Gautam Adani World’s Second Richest Man : भारताचे प्रसिद्ध उद्योजक गौतम अदानी (Gautam Adani) यांनी जगातील श्रीमंत व्यक्तींच्या यादीत दुसरा क्रमांक पटकावला आहे. आता गौतम अदानी जगातील सर्वात श्रीमंत व्यक्ती इलॉन मस्कनंतर (elon musk) दुसरे तर या एलिट यादीत हा मान मिळवणारे पहिलेच भारतीय उद्योगपती आहेत. गौतम अदानी यांनी जगातील अतिश्रीमंतांच्या यादीत LVMH Moet Hennessy – Louis Vuitton चे सह-संस्थापक आणि अध्यक्ष बर्नार्ड अरनॉल्ट यांना मागे टाकून दुसरे स्थान पटकावले आहे. फोर्ब्सच्या आकडेवारीनुसार गौतम अदानी हे आता जगतील दुसऱ्या क्रमांकाचे अतिश्रीमंत व्यक्ती आहेत. या यादीत त्यांच्या अगोदर आता केवळ इलॉन मस्क हेच आहेत.
फोर्ब्सच्या रिअल टाईम बिलियनेअर्स इंडेक्सनुसार, आज दुपारपर्यंत अदानी यांच्या संपत्तीत ५.५ अब्ज डॉलरची वाढ झाली आहे. आणि आता ते सुमारे १५५.७ अब्ज डॉलर्ससह जगातील दुसरे अब्जाधीश बनले आहेत. अशा प्रकारे आता त्यांच्यपुढे म्हणजेच पहिल्या क्रमांकावर टेस्लाचे प्रमुख इलॉन मस्क आहेत, ज्यांची एकूण संपत्ती २७३.५ अब्ज डॉलर आहे. अदानी नंतर बर्नार्ड अर्नॉल्ट १५५.२ अब्ज डॉलरच्या संपत्तीसह तिसऱ्या क्रमांकावर आहे. याशिवाय रिलायन्सचे अध्यक्ष मुकेश अंबानी या यादीत ९२.६ बिलियन डॉलर्सच्या एकूण संपत्तीसह आठव्या क्रमांकावर आहेत.
जगातील सर्वात श्रीमंत व्यक्ती –
फोर्ब्सच्या यादीत सध्या स्पेसएक्स आणि टेस्लाचे मुख्य कार्यकारी अधिकारी(सीईओ) इलॉन मस्क हे अग्रस्थानी आहेत. ज्यांची एकूण संपत्ती २७३.५ अब्ज डॉलर्स आहे. त्याच्यापाठोपाठ अदानी, अरनॉल्ट आणि अॅमेझॉनचे संस्थापक जेफ बेझोस (१४९.७ अब्ज डॉलर्स) यांचा क्रमांक लागतो.
रिलायन्स इंडस्ट्रीजचे अध्यक्ष आणि व्यवस्थापकीय संचालक मुकेश अंबानी ९२.३ अब्ज डॉलर्स संपत्तीसह आठव्या स्थानावर आहेत. त्यांच्या अगोदर मायक्रोसॉफ्टचे संस्थापक बिल गेट्स (१०५.३ अब्ज डॉलर्स ), लॅरी एलिसन (९८.३ अब्ज डॉलर्स) आणि वॉल स्ट्रीटचे वॉरेन बफे (९६.५ अब्ज डॉलर्स) यांचा क्रमांक येतो.
