बेळगाव : शहर परिसरात रविवारी अनेक घरांमध्ये गौरीचे आगमन झाले. कोणी खड्याच्या, कोणी मुखवट्याच्या तर कोणी सुगडावर रेखाटन केलेल्या गौरींची स्थापना केली. गौरीच्या सणासाठी गौरीची झाडे आवश्यक असल्याने बाजारपेठेत ठिकठिकाणी त्यांची विक्री झाली. याशिवाय हळदीची पाने, ओटी भरण्यासाठी वाळूक व पूजेसाठी फुलपत्री यांचीही तेजीत खरेदी झाली. गौरी प्रामुख्याने पाणवठ्यावरून आणण्याची प्रथा आहे. शहरात बहुसंख्य घरांमध्ये विहिरीवरून गौरी आणली जाते. गौरीच्या आगमनासाठी पिवडीने तिची पाऊले रेखाटण्यात आली, आणि गव्हाच्या राशीवर तिची प्रतिष्ठापना करण्यात आली. श्रावणात आपण केलेल्या ज्येष्ठा गौरीच्या शेजारी कनिष्ठा गौरीची स्थापना करण्यात आली. काही घरांमध्ये आजही गौरीचे दोरे बांधून घेण्याची प्रथा आहे. त्यामुळे गौरीच्या पोटामध्ये म्हणजे सुगडामध्ये पिवडीने कालवलेले दोरे अर्थात धागे ठेवण्यात आले. दुपारी गौरीला नैवेद्य दाखवून झाला. सायंकाळी महिलांनी परस्परांना हळदीकुंकू दिले. सोमवारी गौरीच्या जेवणाचा मोठा थाट होणार आहे. त्यामुळे तिच्या तयारीमध्ये महिलावर्ग गुंतला होता.
Tarun Bharat Portal
Amit Kulkarni a versatile content writer, scriptwriter, and content producer at Tarun Bharat Media. Specializes in sports news, local news entertainment, national news and astrology content. His captivating storytelling and deep industry knowledge make him an expert in crafting engaging narratives.
Related Posts
