बेळगाव : गणेशोत्सवाच्या खरेदीसाठी मंगळवारी दुपारनंतर बाजारात प्रचंड गर्दी झाली होती. परंतु सायंकाळी तुरळक पावसाच्या सरी कोसळू लागल्याने गणेशभक्तांच्या आनंदावर विरजन पडले. पावसामुळे बाजारपेठेतील गर्दी हळूहळू कमी होऊ लागल्याने विक्रेत्यांनाही याचा फटक बसला. बुधवार दि. 27 पासून गणेशोत्सवाला प्रारंभ होत आहे. यानिमित्ताने कपडे, तसेच डेकोरेशनसाठी लागणारे साहित्य खरेदी करण्यासाठी मागील चार दिवसांपासून शहरात गर्दी होत आहे. मंगळवारी अखेरचा दिवस असल्यामुळे शहराच्या मुख्य बाजारपेठेसह परिसरात गर्दी झाली होती. गणपत गल्ली, मारुती गल्लीत तर पाय ठेवण्यासही जागा नव्हता. अनेक लहान विक्रेते पूजा, तसेच डेकोरेशनचे साहित्य, फळे विक्री करत होते. सायंकाळी 6 वाजल्यानंतर शहरात तुरळक पाऊस सुरू झाला. पाऊस दाखल झाल्याने सजावटीसह पूजेचे साहित्य झाकून ठेवण्याची वेळ विक्रेत्यांवर आली. पावसामुळे बाजारपेठेतील गर्दीही कमी झाली. मंगळवारी पावसाने विश्रांती घेतली असती तर विक्रीसाठी व्यापाऱ्यांना वेळ मिळाला असता. पावसामुळे रस्त्याशेजारील विक्रेत्यांचे बरेच नुकसान झाल्याच्या प्रतिक्रिया व्यक्त केल्या जात होत्या.
Tarun Bharat Portal
Amit Kulkarni a versatile content writer, scriptwriter, and content producer at Tarun Bharat Media. Specializes in sports news, local news entertainment, national news and astrology content. His captivating storytelling and deep industry knowledge make him an expert in crafting engaging narratives.
Related Posts
