श्रीमूर्तींवर फिरताहेत शेवटचे हात : कार्यशाळांमध्ये लगबग
प्रतिनिधी/ बेळगाव
गणपती बाप्पांचे आगमन… अवघ्या 3 दिवसांवर गणेशचतुर्थी येऊन ठेपली आहे. यामुळे सारेच मूर्तिकार गणेशमूर्तींवर शेवटचा हात फिरवत आहेत. गणेशमूर्ती लवकरात लवकर पूर्ण करण्यासाठी मूर्तिकारांच्या कार्यशाळांमध्ये सध्या लगबग सुरू आहे. रात्रीचा दिवस करत हे मूर्तिकार गणेशमूर्ती पूर्ण करण्यावर भर देत आहेत. शेवटच्या टप्प्यात गणरायांच्या मूर्तींत जीव भरण्याचे काम सुरू आहे.
बेळगावातील गणेशचतुर्थी पुणे आणि मुंबईनंतर मोठय़ा आनंदाने आणि उत्साहाने साजरी केली जाते. त्यामुळे सध्या गणरायांच्या आगमनाच्या तयारीत सर्वांची लगबग सुरू आहे. याला मूर्तिकारही अपवाद नाहीत. सर्व मूर्तिकार गणेशमूर्ती तयार करण्यासाठी घाईगडबडीत असल्याचे चित्र सध्या शहर परिसरात पाहावयास मिळत आहे.
सालाबादप्रमाणे या वर्षीही मूर्तिकार विविध स्वरुपातील मूर्ती साकारण्यात गुंतले असून सार्वजनिक मंडळांच्या मूर्ती रंगविण्यावर अधिक भर देण्यात आला आहे. शहराबरोबरच ग्रामीण भागातही गणरायांच्या आगमनाची चाहूल सर्वांनाच लागून राहिल्याचे चित्र पाहावयास मिळत आहे. मागील वर्षीपेक्षा यावर्षी काही प्रमाणात मूर्तींची मागणी वाढल्याचे मूर्तिकारांतून सांगण्यात आले. याबरोबरच मूर्ती बनविण्यासाठी लागणाऱया साहित्याच्या दरात काही प्रमाणात वाढ झाली आहे.
सध्या अनेक मूर्तिकारांनी घरगुती मूर्ती बनविण्याचे काम संपविले असून आता फक्त सार्वजनिक मंडळांच्या मूर्तींची कामे अंतिम टप्प्यात आहेत. मागील दोन महिन्यांपासूनच या कामाला सुरुवात झाली असली तरी शेवटचे दिवस महत्त्वाचे आहेत. मूर्ती सजविणे या प्रकारातील सर्व प्रकारची कामे सुरू झाली आहेत. नार्वेकर गल्ली येथील विशाल गोदे, अनगोळ येथील जे. जे. पाटील यांचे कुटुंबीय, कपिलेश्वर रोड येथील कुंभार बंधू, अनगोळ येथील संजय मस्के यांच्यासह इतर मूर्तिकार सध्या मूर्ती साकारण्यात गुंतल्याचे दिसून येत आहे.
हुबळी, धारवाड, विजापूर, गोवा आदी ठिकाणी पाठविण्यात येणाऱया मूर्तींवर शेवटचा हात फिरविण्यात येत आहे. सोमवार, मंगळवारपर्यंत ही कामे चालणार आहेत. बेळगावातील गणेशोत्सव हा अनेकांना भुरळ घालतो. गोवा, महाराष्ट्रातील लोक गणेशमूर्ती पाहण्यासाठी बेळगावात येत असतात. सध्या सर्वच मूर्तिकार सुबक आणि आकर्षक मूर्ती बनविण्याकडे वळले आहेत. या संदर्भात मूर्तिकारांशी संवाद साधला असता आता शेवटचे थोडेच दिवस उरले असून मूर्ती सजविण्याच्या प्रक्रियेला सुरुवात झाली आहे, अशी माहिती त्यांनी दिली.
ज्याप्रमाणे मूर्तीचे काम पूर्ण होईल त्याप्रमाणे मंडळे आपापल्या मूर्ती घेऊन जात आहेत. यामुळे दिवसरात्र काम सुरू आहे. यावषी मंडळांनी विविध आकारातील आकर्षक मूर्तींना आणि रंगसंगतींवर भर दिला आहे. यामुळे शेवटच्या टप्प्यातील हे काम अतिशय काळजीपूर्वक आणि तितक्मयाच जलद गतीने करावे लागते. यावषी मूर्तीला सजविण्यासाठी गणेश मंडळांकडून तसेच घरगुती उत्सव साजरा करणाऱया भाविकांकडून कुंदन वर्कची मागणी वाढली आहे. आकर्षक आणि चमकदार साहित्याने आपल्या मूर्तीला सजवून घेण्यावर अनेकांचा भर आहे. मूर्तिकार जितके महत्त्वाचे तितकेच त्यांना साहाय्य करणारे कारागीरही महत्त्वाचे. रंगकाम पूर्ण झाल्यानंतर गणेशमूर्तीचे सुळे, नेत्र, कपाळावरील तिलक आदी गोष्टींकडे विशेष भर द्यावा लागतो. ही कामे सध्या सुरू आहेत. जास्तीत जास्त काम ओढून काढण्याचा प्रयत्न सध्या मूर्तिकार करत आहेत. महिलावर्गही मूर्ती रंगकामात अधिक संख्येने गुंतला आहे. महिला घरातील काम संपवून दुपारनंतर मूर्ती रंगविण्यासाठी बसलेल्या दिसत आहेत. तरुणीसुद्धा मूर्तीवर कुंदन वर्क करण्यात मग्न आहेत. मागील वर्षी केलेल्या बुकिंगप्रमाणे यावर्षी सार्वजनिक मंडळांची मागणी लक्षात घेता मूर्तिकारांनी मूर्ती बनविल्या आहेत. मंडळांनीही मंडप उभारणीपासून इतर तयारी सुरू केली आहे. मूर्ती घेऊन जाण्याची लगबग सुरू आहे. गणेशचतुर्थीला मूर्ती नेताना उशीर होऊ नये म्हणून आतापासूनच काही मंडळे मूर्तिकारांच्या कार्यशाळांमध्ये गर्दी करू लागले आहेत. मूर्तीवर शेवटचा हात फिरविताना आणि मूर्तीमध्ये जीव भरताना मूर्तिकार तल्लीन होऊन जातो आणि पाहणारेही हरखून जातात, असेच चित्र सध्या कार्यशाळांमध्ये दिसून येत आहे.
