पर्यटन विभागाने मागवल्या निविदा : विकासकामांना लवकरच होणार सुरुवात
प्रतिनिधी/ बेळगाव
कर्नाटक, महाराष्ट्र, गोवा येथील भाविकांचे श्रद्धास्थान असलेल्या सौंदत्ती येथील यल्लम्मादेवी मंदिराचा विकास करण्यात येणार आहे. कर्नाटक सरकारच्या पर्यटन विभागाअंतर्गत ‘प्रसाद’ योजनेतून यल्लम्मा मंदिराचा कायापालट होणार आहे. नुकत्याच या कामासाठी निविदा मागवण्यात आल्या आहेत. त्यामुळे येत्या काळात मंदिर परिसराचा विकास होणार आहे.
पर्यटन विभागाने 1 हजार 837.27 लाख रुपयांच्या निविदा मागवल्या आहेत. पावसाळ्याचे दिवस धरून पुढील नऊ महिन्यांत कंत्राटदाराला हे काम पूर्ण करावे लागणार आहे. या निधीतून मंदिराचा विस्तार करण्यासोबतच नवीन सोयीसुविधा दिल्या जाणार आहेत. यामुळे स्थानिक लोकांना रोजगाराच्या संधी उपलब्ध होणार आहेत.
इच्छुक कंत्राटदारांना या निविदेमध्ये संधी दिली जाणार आहे. 15 लाख रुपये अनामत रक्कम निश्चित करण्यात आली आहे. ज्या कंत्राटदाराने 918.64 लाखापेक्षा अधिक रकमेची कामे मागील पाच वर्षांत पूर्ण केली आहेत, अशा कंत्राटदाराला अर्ज करता येणार आहे. दरवर्षी लाखो भाविक यल्लम्मा देवस्थानला भेट देत असतात. परंतु, या ठिकाणी सुविधा उपलब्ध नसल्याने वेळोवेळी नाराजी व्यक्त करण्यात येते. त्यामुळे राज्य सरकारने भरीव निधी दिला असून कामाला लवकरच सुरुवात होणार आहे.
