गोव्यात सध्या पिकलबॉल या खेळाने सर्वांना मोहित करून टाकले आहे. दोन वर्षांत सुमारे 45 कोर्टपॅडल, प्लास्टिक बॉल्स आणि उत्साही समुदाय आता गोव्याला भारताची पुढील पिकलहब बनवत आहे. फुटबॉल मैदानांपासून बॅडमिंटन कोर्टपर्यंत, गोव्यातील लोकांनी नेहमीच स्पर्धेसाठी नैसर्गिक प्रतिभा दाखवली आहे. परंतू गेल्या दोन वर्षांत, राज्यातील क्लब आणि रिसोट्समध्ये एक नवीन आवाज घुमू लागला आहे. पिकलबॉलने पॅडलवर मारल्याचा लयबद्ध पॉप……..
पिकलबॉल हे बॅडमिंटन, टेनिस आणि टेबलटेनिस खेळाचे एक मिश्रण. तो पॅडल आणि छिद्रित प्लास्टिक बॉलसह लहान कोर्टवर खेळला जातो, ज्यामुळे तो शिकणे सोपे आहे. या खेळाची सर्वांत मोठी ताकद त्याच्या समावेशकतेमध्ये आहे. ज्यामध्ये मुले, प्रौढ आणि जेष्ठ सर्व समान कोर्ट सामायिक करू शकतात. ‘पिकलबॉल हे सक्रिय आणि निरोगी जीवनशैलीचे प्रवेशद्वार म्हणून काम करते. हा खेळ परवडणारा आणि जुळवून घेण्यासारखा आहे आणि तो इतर काही खेळांसारखा लोकांना एकत्र आणतो, असे गोवा पिकलबॉल संघटनेचे संस्थापक अध्यक्ष आणि आता सल्लागार असलेले मनोज पाटील म्हणाले.
गोवा पिकलबॉल संघटनेचा उदय
अखिल भारतीय पिकलबॉल संघटनेशी संलग्न असलेली गोवा पिकलबॉल संघटनेची स्थापना 2022 मध्ये झाली. या खेळाची ओळख गोव्याच्या कानाकोपऱ्यात पोहोचवण्याचे स्पष्ट ध्येय होते. अवघ्या दोन वर्षांत, ते स्वप्न प्रत्यक्षात आले आहे. अध्यक्ष मयुर सावकार आणि सचिव मांगिरीष कुंदे यांच्या नेतृत्वाखाली, असोसिएशनने खेळाडूंचे सक्रिय नेटवर्क तयार केले आहे. मासिक रेंकिंग स्पर्धा, आंतर क्लब एक्सचेंज कार्यक्रम आणि शाळांत क्लिनिक्स आयोजित केली आहेत. गोवा पिकलबॉल संघटनेने ध्येय केवळ स्पर्धा वाढवणे नाही तर जगभरातील पिकलबॉलचे वैशिष्ट्या असलेल्या सामुदायिक भावनेला प्रोत्साहन देणे देखील आहे.
या खेळात गोव्याची प्रगती अभूतपूर्व असल्याचे संघटनेचे अध्यक्ष मयुर सावकार म्हणतात, ‘आमच्या पहिल्या कार्यशाळेपासून राष्ट्रीय पिकलबॉल स्पर्धेत पदके जिंकण्यापर्यंतचा हा प्रवास उत्कटनेने प्रेरित होता. पणजी जिमखाना, क्लुब टेनिस दी गास्पार दियश, मडगावचे बीपीएस क्लब, आसगाव आणि इतर विविध ठिकाणी नवीन कोर्ट्सची निर्मिती करण्यात येत असल्याने, गोवा हे भारतातील प्रमुख पिकलबॉल डेस्टिनेशनपैकी एक म्हणून उदयास येत आहे.
पिकलबॉल खेळाच्या ग्रासरूटच्या विकासात महत्वाची भूमिका बजावणारे मांगिरीष कुंदे म्हणतात- ‘पणजी, मडगाव, वास्को, आसगाव, कळंगूट आणि म्हापसा येथील समुदाय या चळवळीचा कणा आहे. नियमित सामने, विकएन्ड मिक्सर्स आणि एक्सचेंज कार्यक्रमांनी आता एक संस्कृती निर्माण केली आहे जिथे लोक केवळ पिकलबॉल खेळत नाहीत तर त्यांच्याशी जोडले जातात.
पिकलबॉल खेळासाठी पायाभूत सुविधांची भरभराट
गोव्यात पिकलबॉल खेळाचा झालेला प्रसार हे सध्या असलेल्या त्यांच्या 45 कोर्ट्सवरून दिसून येत आहे. 2022 मध्ये राज्यात एकही कोर्ट नव्हता. आता त्यांची संख्या 45 झाली आहे. आणखी 10 कोर्ट्स होणार आहेत. पिकलबॉल खेळाला आता प्रतिष्ठित ठिकाणी तसेच शाळा आणि गृहनिर्माण संस्थांमध्येही स्थान मिळाले आहे. गोव्यात ताज फोर्ट आग्वाद बीच रिसोर्ट व बीपीएस क्लब मडगावात प्रत्येकी 4, पणजी जिमखाना, क्लुब टेनिस दी गास्पार दियश, आसगाच्या क्लुब दी फ्लॉरेस्टा आणि वास्कोतील चौगुले रेसिडन्सीत प्रत्येकी दोन तर मडगावच्या सोगोफीट, ग्रीन मिडॉस स्कूल व बांबोळी बीच रिसोर्टमध्ये प्रत्येकी एक पिकलबॉल कोर्ट आहे. या विस्ताराचे नेतृत्व पिकलबॉल संघटनेचे सल्लागार आणि प्रसिद्ध क्रीडा व्यवस्थापन सल्लागार आदित्य ओबेरॉय यांनी केले आहे. त्यांच्या पुढाकारांमुळे पिकलबॉलला हॉस्पिटेलिटी आणि शैक्षणिक क्षेत्रात आणण्यास मदत झाली आहे. ‘गोव्यातील प्रत्येक तालुक्यात दर्जेदार पिकलबॉल कोर्ट असणे हे आमचे ध्येय आहे. सुलभता सहभागाला चालना देते आणि सहभाग वाढीला चालना देतो, असे ओबेरॉय स्पष्ट करतात.
पिकलबॉल खेळात गोवा राष्ट्रीय नकाशावर
मे 2023 मध्ये गोव्यात फातोर्डा टेनिस कोर्टवर तिसऱ्या राष्ट्रीय रेंकींग स्पर्धेचे आयोजन करण्यात आले. साग व आणि पिकलबॉल महासंघाच्या सहकार्याने झालेल्या या स्पर्धेत मुख्यमंत्री डॉ. प्रमोद सावंत यांनी केवळ या स्पर्धेचे उद्घाटन केले नाही तर सहभागींसोबत काही रॅली खेळण्यासाठी पॅडल देखील उचलला. नंतर सोशल मिडियावर पोस्ट करताना डॉ. सावंत यांनी पिकलबॉलमध्ये माझा हात आजमावण्याचा अनुभव सुखद होता असे म्हटलं. गोव्यात केवळ राष्ट्रीयच नव्हे तर पिकलबॉलचे आंतरराष्ट्रीय केंद्र बनण्याची क्षमता आहे. आपल्या सुंदर राज्यात या रोमांचक खेळाचा विकास करण्यासाठी आपण एकत्र काम करूया, असेही मुख्यमंत्री म्हणाले.
हल्लीच मडगावात बीपीएस क्लबने आयोजित केलेल्या राज्यस्तरीय पिकलबॉल स्पर्धेला स्पर्धकांचा चांगला प्रतिसाद मिळाला व यात 120 खेळाडूंनी भाग घेतला. निहाल बोरकर, निशाद शेवडे, सिमरन बुंदेलाने सदर स्पर्धा गाजवली. त्विशा सरदेसाई आणि ऋता सुतार या प्रतिभावंत खेळाडूंनीही स्पर्धेत छाप पाडली.
पिकलबॉल राष्ट्रीय स्पर्धेत गोव्याचा दबदबा
जम्मूत झालेल्या 9व्या अखिल भारतीय पिकलबॉल राष्ट्रींय स्पर्धेत गोव्याने जबरदस्त कामगिरी केली आणि 5 सुवर्ण, 2 रौप्य, एक ब्राँझ तसेच वॅटरन्स गटात सांघिक जेतेपदही मिळविले. नॉएल नोरोन्हा, ऑड्री मिनेझिस. क्लेरेंस नोरोन्हा, जेम्स अँडरसन, पराग जोशी आणि त्विशा सरदेसाई यांनी गोव्याला राष्ट्रीय पदके मिळवून दिली.
क्रीडा पर्यटनाला प्रोत्साहन देण्यासाठी पर्यटन संस्थांशी सहयोगावर भर
गोवा पिकलबॉल संघटनेचे उद्दिष्ट नजीकच्या भविष्यात दहा ते तीस अधिक कोर्ट जोडणे, शालेय सहभाग वाढवणे आणि पिकलबॉलद्वारे क्रीडा पर्यटनाला प्रोत्साहन देण्यासाठी पर्यटन संस्थांशी सहयोग करणे आहे. राज्य पिकलबॉल संघटनेला गोवा ऑलिम्पिक संघटनेची तात्पुरती मान्यता देखील आहे, ज्यामुळे संस्थात्मक पाठिंबा बळकट झाला आहे. पिकलबॉल खेळाचा आढावा घेताना संघटनेचे माजी अध्यक्ष आणि आता सल्लागार असलेले मनोज पाटील त्याचा सारांश उत्तम प्रकारे देतात. ‘आम्ही सुरूवात केली तेव्हा पिकलबॉल हा एक प्रयोग होता, आज ती एक चळवळ आहे. शून्य कोर्टपासून 45 कोर्टपर्यंत, कार्यशाळांपासून ते राष्ट्रीय पदकापर्यंत – ही प्रगतीची कहाणी प्रत्येक गोव्याच्या व्यक्तिची आहे ज्याने पॅडल उचलला आहे.’ खरंच, गोव्याच्या पिकलबॉलची कहाणी केवळ खेळाबद्दल नाही तर ती समुदायाबद्दल आdरण खेळाच्या आनंदाबद्दल आहे.
-संदीप मो. रेडकर
