भोगावती,प्रतिनिधी
Kolhapur Crime News : खोटे सोने देऊन कुक्कुडवाडी ता.राधानगरी येथील श्रीमती नानुबाई दादु पाटील (वय-६५) या वृध्द महिलेची सुमारे ८७ हजार ५०० रुपयांची फसवणूक अज्ञात महिला व दोन पुरुषांनी करण्याचा प्रकार घडला आहे. खरे सोने घेऊन महिलेला खोटे सोने देऊन त्यांनी पलायन केले. याप्रकरणी महिलेने राधानगरी पोलीस ठाण्यात तक्रार केली आहे.
याची अधिक माहीती अशी की, श्रीमती नानुबाई पाटील कसबा तारळे गावाकडून कुक्कुडवाडीकडे चालत जात होत्या. त्यावेळी एक महिला व दोन पुरुष त्यांना भेटले. आम्हाला पैशांची अडचण असुन आमच्या पाच तोळ्यांच्या पुतळ्या घेण्याचा हट्ट धरला. मात्र त्यांनी नकार देताच महिलेसोबत असणाऱ्या दोन पुरुषांनी ते जुने सोने आहे असे सांगुन त्यांच्या कानातील दोन कुड्या,बोरमाळ असे ८७ हजार ५०० रुपयांचे सोने घेऊन पसार झाले. त्यानंतर पाटील यांनी भामट्या महिलेने दिलेल्या पुतळ्यांची सोनाराकडे तपासणी केली.त्यावेळी खोटे सोने देऊन आपली फसवणुक झाल्याचे त्यांच्या लक्षात आले.यानंतर त्यांनी राधानगरी पोलीस ठाण्यात तक्रार दिली आहे.राधानगरीचे पो.नि.ईश्वर ओमासे, पो.ना.गुरव अधिक तपास करीत आहेत.
