चार मोकाट जनावरे सोमवारी पकडली

बेळगाव : महापालिकेच्या पशुसंगोपन विभागाकडून शहरात मोकाट जनावरांची धरपकड करून त्यांची रवानगी श्रीनगर येथील गो-शाळेत केली जात आहे. सोमवारी पोलीस आयुक्तालय आणि पाटील गल्लीत चार जनावरे पकडण्यात आली. गणेशोत्सव काळात जनावरांमुळे वाहतूक समस्या निर्माण होऊ नये, यासाठी महापालिकेकडून दररोज जनावरे पकडली जात आहेत. कॉलेज रोडवरील पोलीस आयुक्त कार्यालय परिसरात मोकाट जनावरे फिरत आहेत, अशी माहिती मनपाचे वरिष्ठ पशुसंगोपन निरीक्षक राजू संकन्नावर यांना मिळाली होती. त्यानुसार त्यांनी आपल्या सहकाऱ्यांसह त्या ठिकाणी दाखल होत तेथील तीन जनावरे पकडली. त्यानंतर पाटील गल्लीत एक जनावर पकडण्यात आले. पकडलेल्या सर्व जनावरांची रवानगी श्रीनगर येथील गो-शाळेत करण्यात आली आहे. सोमवारपर्यंत श्रीनगर गो-शाळेत एकूण 37 जनावरे आहेत, असे मनपा पशुसंगोपन विभागाकडून सांगण्यात आले.