पुणे : सावित्रीबाई फुले पुणे विद्यापीठाचे माजी कुलगुरू डॉ. राम ताकवले यांचे शनिवारी रात्री उशिरा एका खासगी रुग्णालयात निधन झाले. ते ९० वर्षांचे होते.रविवारी सकाळी साडेदहाच्या सुमारास त्यांच्या पार्थिवावर अंत्यसंस्कार करण्यात आले.
डॉ. ताकवले हे समाजवादी विचारसरणीतून जडणघडण झालेले ज्येष्ठ शिक्षणतज्ज्ञ म्हणून सुपरिचित होते. ताकवले यांचा जन्म भोर तालुक्यातील अंबाडे येथे झाला. त्यांचे वडील प्राथमिक शिक्षक असल्यामुळे त्यांचे काही शालेय शिक्षण पुणे जिल्ह्यातील खेडेगावात झाले. त्यांच्या वडिलांची पुण्याला पदोन्नतीवर बदली झाल्यामुळे पुणे येथे शालेय शिक्षण पूर्ण करून ते फर्ग्युसन महाविद्यालयात दाखल झाले. तेथून बी.एस्सी. १९५६ साली आणि पुणे विद्यापीठातून एम.एस्सी. १९५७ साली प्राप्त करताना त्यांनी भौतिकशास्त्र आणि सैद्धान्तिक भौतिकशास्त्राचा अभ्यास केला. त्यांनी फर्ग्युसन महाविद्यालयात आणि पुणे विद्यापीठात भौतिकशास्त्राचे अध्यापन केले. मॉस्को विद्यापीठातून त्यांनी पीएच.डी. संपादन केली.
पुणे विद्यापीठातील अध्यापनानंतर ते इ.स. १९७८-१९८४ आणि इ.स. १९८८-१९८९ या वर्षी पुणे विद्यापीठात कुलगुरूपदी होते. इ.स. १९८५ ते १९८७ या वर्षांत त्यांनी राज्य शासनाच्या शिक्षण विभागातर्फे महाराष्ट्र मुक्त विद्यापीठाचे समन्वयक म्हणून काम पाहिले. इ.स. १९८९-१९९५ या कालावधीत त्यांनी यशवंतराव चव्हाण महाराष्ट्र मुक्त विद्यापीठाच्या कुलगुरूपदाची जबाबदारी सांभाळली, तसेच इ.स.१९९५-१९९८ या कालावधीत ते इंदिरा गांधी राष्ट्रीय मुक्त विद्यापीठाचे कुलगुरू होते.
