अन्विने केदारकंठा शिखरावर साजरी केली शिवजयंती
गडकोट संवर्धनाचा दिला संदेश
अन्विचा गिर्यारोहक क्षेत्रात आणखी एक जागतिक विक्रम
कोल्हापूर
हिमालय पर्वत रांगेतील उत्तराखंड राज्यातील ‘केदारकंठा’ (समुद्रसपाटीपासून १२५०० फूट उंच) हे शिखर कोल्हापूरची जागतिक विक्रमवीर गिर्यारोहक ‘अन्वी’ अनिता चेतन घाटगे हिने पार केले आहे. अन्वी ५ वर्षाची असून तिने १९ फेब्रुवारीदिवशी शिवजयंती या शिखरावर जाऊन छत्रपती शिवाजी महाराजांचे प्रतिमा पूजन करून शिवध्वज फडकवत साजरी केली.
अन्वीने १६ फेब्रुवारी रोजी देहरादून ते साक्री असा २१० किलोमीटर प्रवास करुन साक्री येथे पोहचली. त्यानंतर १७ फेब्रुवारीपासून साक्री येथुन मुख्य चढाईस सुरुवात केली. – 6° अंश सेल्सिअस तापमानात , गोठवणारी थंडी, शिखरावर चढाई करत असताना होणारी ऑक्सिजनची कमतरता, बर्फावरील निसरडी वाट अशा प्रतिकूल परिस्थितीत २ दिवसाची चढाई करत अन्वी १८ फेब्रुवारी रोजी बेस कॅम्पवर पोहोचली.
१९ फेब्रुवारी रोजी मध्यरात्री २ वाजता पुन्हा शिखरावर चढाई करण्यास सुरुवात केली. अंधारातून बर्फाच्छादित जमिनीवरून वाट काढत, निसरड्या बर्फावरून अत्यंत थंडीत उणे – १५°C अंश सेल्सिअस तापमानात अत्यंत धैर्याने व आत्मविश्वासाने, शारीरिक व मानसिक क्षमतेचा कस लावून चढाई करत अन्वी सकाळी ७ च्या सुमारास सूर्योदयाला शिखरावर पोहोचली.
केदारकंठा हे बर्फाच्छादित शिखर १२,५०० फूट उंच आहे. उणे -15° C अंश सेलसिअस तापमानामध्ये स्वतःच्या पायाने चढाई करणारी व परत साक्री येथे पोहोचणारी अन्वी ही जगातील सर्वात लहान गिर्यारोहक ठरली आहे. अन्वीचा हा सहावा जागतिक विक्रम असून लवकरच त्याचे नोंद वर्ल्ड रेकॉर्डमध्ये होणार आहे. अन्वीच्या या विक्रमाबाबत शिवा ॲडव्हेंचरचे फाऊंडर प्रमोद राणा व युवा वर्ल्डचे तेजस जिबकाठे यांनी प्रमाणपत्र दिले आहे.
यापूर्वी अन्विने गिर्यारोहण क्षेत्रात ५ वर्ल्ड रेकॉर्ड, ६ एशिया बुक ऑफ रेकॉर्ड , ६ इंडिया बुक ऑफ रेकॉर्ड नोंदवले असून तिने ६२ गडकोट दुर्ग संवर्धन व स्वच्छता मोहीम केले आहेत. तसेच २५० हून अधिक, व्यक्ती, संस्था व संघटना यांनी अन्वीला सन्मानित केले आहे. तसेच अन्विने २१०० देशी झाडांची लागवड केली आहे. या मोहिमेमध्ये अन्विसोबत प्राध्यापक अनिल मगर, प्रशिक्षक व आई अनिता घाटगे, वडील चेतन घाटगे, गाईड मनोज राणा व इतर गिर्यारोहक सहभागी झाले होते.
