पुणे / वार्ताहर :
एमपीएससी परीक्षेत उत्तीर्ण झालेल्या दर्शना पवारच्या संशयास्पद मृत्यूचे गूढ उकलण्यासाठी ग्रामीण पोलिसांनी पाच पथके तयार केली आहेत. दर्शनाचा मृतदेह राजगड किल्ल्याच्या पायथ्याला असलेल्या सतीचा माळ परिसरात रविवारी आढळून आला होता.
एमपीएससी परीक्षेत दर्शना दत्ता पवार (वय २६, रा. कोपरगाव, जि. अहमदनगर) उत्तीर्ण झाली होती. वनपरिक्षेत्र अधिकारी म्हणून तिची निवड करण्यात आली होती. एमपीएससी परीक्षेत ती राज्यातून सहाव्या क्रमांकाने उत्तीर्ण झाली होती.
पुण्यातील एका संस्थेकडून तिचा सत्कार आयोजित करण्यात आला होता. ९ जून रोजी ती पुण्यात आली होती. सिंहगड रस्ता भागातील नऱ्हे परिसरात एका मैत्रिणीकडे ती राहत होती. १२ जून रोजी सिंहगड किल्ल्यावर निघाली आहे, असे मैत्रिणीला सांगून ती घराबाहेर पडली. दर्शनाने कुटुंबीयांना याबाबतची माहिती दिली होती. तिच्यासोबत राहुल दत्तात्रय हांडोरे होता. १२ जूननंतर तिचा मोबाइल क्रमांक बंद झाला. तिच्या कुटुंबीयांनी संपर्क साधला. मात्र, तिचा मोबाइल क्रमांक बंद असल्याचे लक्षात आल्यानंतर तिच्या कुटुंबीयांनी शोध घेतला. मात्र, तिचा ठावठिकाणा लागला नाही. त्यानंतर तिच्या कुटुंबीयांनी दर्शना बेपत्ता असल्याची तक्रार सिंहगड रस्ता पोलीस ठाण्यात दिली.
दरम्यान, दर्शनाबरोबर असलेला मित्र राहुल हांडोरे बेपत्ता झाल्याचे निदर्शनास आल्यानंतर त्याच्या कुटुंबीयांनी तो बेपत्ता झाल्याची तक्रार वारजे पोलीस ठाण्यात दिली होती. रविवारी राजगड किल्ल्याच्या पायथ्याशी असलेल्या सतीचा माळ परिसरात दर्शनाचा मृतदेह सापडला. दर्शना आणि तिचा मित्रन राहुल हांडोरे १२ जून रोजी दुचाकीवरुन वेल्हे तालुक्यातील राजगड किल्ला परिसरात गेले होते. सकाळी सव्वासहाच्या सुमारास दोघे जण गडाच्या पायथ्याशी पोहोचले. दोघानी गड चढायला सुरुवात केली. सकाळी दहाच्या सुमारस राहुल गडावरुन एकटात खाली आला. राजगड किल्ल्याच्या पायथ्याशी असलेल्या एका हाॅटेलच्या परिसरातील सीसीटीव्ही चित्रीकरणातून माहिती उपलब्ध झाली आहे. दर्शनाचा मित्र राहुल पसार झाला असून त्याचा शोध घेण्यात येत आहे. दर्शनाच्या मृतदेहाचे शवविच्छेदन करण्यात आले आहे. अद्याप पोलिसांना शवविच्छेदन अहवाल मिळाला नसून, शवविच्छेदन अहवालातून तिच्या मृत्यूमागचे कारण समजेल.
