प्रतिनिधी,रत्नागिरी
Ratnagiri Crime News : बँकेची आर्थिक फसवणूक केल्याप्रकरणी कोल्हापूरच्या 6 जणांविरोधात रत्नागिरी शहर पोलीस ठाण्यात गुन्हा दाखल करण्यात आला आहे. ही घटना 18 मे ते 23 मे या काळात घडली.
पोलिसांकडून प्राप्त माहितीनुसार, बँकेची आर्थिक फसवणूक केल्याप्रकरणी लिंगराज लकाप्प्पा जाधव ( वय- 49), उत्तरेश्वर मनोहर मुंढे (वय- 63), उध्दव तुकाराम मुंढे (वय- 71), नजीर मीरासाहेब बारगीर (वय-77), अलताब गुलाब शेख, सुदर्शन धनचंद्र चौगुले (सर्व रा. कोल्हापूर) या 6 जणांविरोधात गुन्हा दाखल करण्यात आला आहे.याबाबत फिर्याद मनोहर मारुती पाटील (वय-39, रा. शिवाजीनगर ता. जि. रत्नागिरी) यांनी दिली.
संशयितांमधील लिंगराज जाधव याने ग्रामीण बँक शाखा येथून 16 लाख 40 हजारांची रक्कम कर्ज घेतली. यानंतर कुवारबांव येथील मयुरेश रेसिडेन्सी या इमारतीमधील निवासी सदनिका क्र.3 व 4 खरेदी केल्या.आणि याबाबतचे खरेदी खत नुक्रमांक 6396/2019 रत्नागिरी येथील दुय्यम निबंधक कार्यालयात नोंदवले. मात्र हा दस्तऐवज बँकेत जमा करणे गरजेचे असताना ते जमा केले नाही. शिवाय घेतलेल्या कर्जाच्या रकमेची परतफेड न करता खरेदी केलेल्या दोन्ही सदनिका उत्तरेश्वर मनोहर मुंढे यांना खरेदीपत्र दस्त क्र. 3127/2023 नोंदणीकृत करुन दिल्या.
दरम्यान, खरेदी खत करताना बँकेकडे 25 लाख 25 हजार रुपये बाकी असताना या सदनिका या निवासी सदनिका मिळकतीवर कसलाही बोजा नाही आणि मिळकत निर्वेध व निष्कर्जी बोजा विरहित आहे असे खोटे नमूद केले. हे खरेदी खत करण्यास ओळख म्हणून लिंगराज लकाप्प्पा जाधव,उत्तरेश्वर मनोहर मुंढे यांनी तक्रारदार बँकेला कोणत्याही स्वरुपाची कल्पना न देता नोंदणीकृत खरेदी करून बँकेची आर्थिक फसवणूक केली.खरेदी खत करण्यास ओळख म्हणून उध्दव तुकाराम मुंढे,नजीर मीरासाहेब बारगीर,अलताब गुलाब शेख,सुदर्शन धनचंद्र चौगुले यांनी मदत केली.या सर्व प्रकाराने बँकेची तब्बल 25 लाख 25 हजारांची आर्थिक फसवणूक केली आली. याप्रकरणी या 6 संशयितांविरोधात रत्नागिरी शहर पोलीस ठाण्यात गुन्हा दाखल करण्यात आला आहे. या प्रकरणाचा अधिकचा तपास शहर पोलीस करत आहेत.
