जळगाव / प्रतिनिधी :
जळगाव जिल्हा सहकारी दूध उत्पादक संघातील वादग्रस्त 132 नोकरांची भरती रद्द करण्याचा निर्णय संचालक मंडळाच्या बैठकीत एकमताने घेण्यात आल्याची माहिती दूध संघाचे नुतन चेअरमन आ. मंगेश चव्हाण यांनी दिली. संचालक मंडळाचा हा निर्णय आ. एकनाथ खडसे यांना धक्का देणारा आहे.
जळगाव जिल्हा दूध उत्पादक संघात माजी अध्यक्षा मंदाकिनी खडसे यांच्या कार्यकाळात 32 अधिकारी व 132 कर्मचारी भरती प्रक्रिया सुरू करण्यात आली होती. अर्ज दाखल केलेल्या उमेदवारांनी लेखी परीक्षा देखील दिली होती. मात्र या भरतीवर दूध संघाच्या माजी कर्मचा-यांनीच हरकत घेतली होती. दूध संघाच्या संचालकांची मुदत संपली असतांना ते भरती करू शकत नाही, तसेच आरक्षण लागू असतांना विना आरक्षण भरती पक्रिया राबवली जात असल्याचा आराप केला गेला. याबाबत उच्च न्यायालयात याचिका दाखल केली गेली होती.
मंदाकिनी खडसे यांच्या काळात संघाला 9 कोटी 60 लाख रूपये तोटा झाल्याचा दावा करत आ. मंगेश चव्हाण यांनी दूध संघाची आर्थिक स्थिती बिकट असल्याचे कारण देत ही भरती प्रक्रिया संचालक मंडळाने रद्द केल्याचे सांगितले.
