अखेर महात्मा फुले रोडवरील गटारींच्या सफाईकामाला सुरुवात

बेळगाव : महात्मा फुले रोडवरील गटारींच्या सफाईचे काम अखेर महापालिकेकडून हाती घेण्यात आले आहे. याबाबत ‘तरुण भारत’ने ‘गटारींच्या सफाईकडे दुर्लक्ष’ या मथळ्याखाली वृत्त प्रसिद्ध केल्यानंतर सफाई कामाला सुरुवात केली आहे. त्यामुळे परिसरातील रहिवासी व व्यापाऱ्यांतून समाधान व्यक्त केले जात आहे. महात्मा फुले रोडवरील गटारीवर काँक्रीटचे स्लॅब घालण्यात आले असल्याने सफाईअभावी गटारी ठिकठिकाणी तुंबल्या आहेत. सांडपाणी वाहून जाण्यास मार्ग नसल्याने अनेक ठिकाणी सांडपाणी गटारीतून बाहेर पडत आहे. त्याचबरोबर डासांची पैदास देखील वाढली असून दुर्गंधीही पसरली आहे. त्यामुळे गटारीवरील स्लॅब हटवून सफाई करण्यात यावी, अशी मागणी नगरसेवक गिरीश धोंगडी वारंवार महापालिकेच्या बैठकीत करत होते. मात्र, त्याकडे अधिकाऱ्यांनी दुर्लक्ष केल्याने अखेर महापौर मंगेश पवार, उपमहापौर वाणी जोशी व मनपाच्या अधीक्षक अभियंत्या लक्ष्मी निपाणीकर व इतर अधिकाऱ्यांनी प्रत्यक्ष भेट देऊन गटारींची स्वच्छता करण्याची सूचना केली होती. त्यानुसार मनपा अधिकाऱ्यांनी व कर्मचाऱ्यांनी महात्मा फुले रोडवरील सिमेंट काँक्रीटचे स्लॅब ठिकठिकाणी फोडले होते. मात्र, प्रत्यक्षात गटारींची सफाई करण्यात आली नव्हती. त्यामुळे याबाबत ‘तरुण भारत’ने बातमी प्रसिद्ध करताच जागे झालेल्या महापालिकेने अखेर गटारींच्या सफाईचे काम सुरू केले आहे. त्यामुळे पावसाळ्यापूर्वी गटारी स्वच्छ होणार असल्याने स्थानिक रहिवासी व व्यापाऱ्यांतून समाधान व्यक्त केले जात आहे.