अखेर ‘त्या’ जखमी गायीची गो-शाळेत रवानगी

बेळगाव : रामदेव गल्ली आणि केळकर बाग परिसरात जखमी अवस्थेत फिरणाऱ्या मोकाट गायीला महापालिकेच्या पशुसंगोपन विभागाच्यावतीने पकडण्यात आले. जखमी गायीवर औषधोपचार करून त्याची रवानगी श्रीनगर येथील गो-शाळेत करण्यात आली. गेल्या अनेक दिवसांपासून सदर गाय जखमी अवस्थेत फिरत होती. तिला पकडून तिच्यावर औषधोपचार करण्यासह गो-शाळेत रवानगी केल्याने नागरिकांतून समाधान व्यक्त केले जात आहे. समोरच्या पायाला दुखापत झालेली एक गाय गेल्या काही दिवसापासून बकरी मंडई, गणाचारी गल्ली, रामदेव गल्ली, गोंधळी गल्ली, केळकरबाग परिसरात, फिरत होती. सदर गायीला पकडून नेण्यासह तिच्यावर उपचार करावेत यासाठी काहींनी महापालिकेच्या पशुसंगोपन विभागाचे वरिष्ठ पशुनिरीक्षक राजू संकण्णावर यांना संपर्क साधून माहिती दिली. त्यामुळे ते बुधवारी सकाळी वाहनासह रामदेव गल्ली याठिकाणी दाखल झाले. परिसरात जखमी अवस्थेत फिरणाऱ्या गायीला कर्मचाऱ्यांनी शिताफीने पकडून वाहनात घातले. श्रीनगर येथील गो-शाळेत रवानगी करून तिच्यावर उपचार करण्यात आले.