चेअरमन प्रमोद गावडे यांची माहिती
न्हावेली / वार्ताहर
मान्सूनपूर्व पावसाने दमदार हजेरी लावल्यामुळे सावंतवाडी तालुक्यातील शेतकरी आता खरीप हंगामाच्या तयारीला लागले आहेत. या पार्श्वभूमीवर सावंतवाडी तालुका सहकारी खरेदी विक्री संघाने शेतकऱ्यांसाठी आवश्यक खते विविध प्रकारची भात बियाणे आणि किटकनाशके उपलब्ध करून ठेवली आहेत अशी माहिती खरेदी विक्री संघाचे अध्यक्ष प्रमोद गावडे यांनी दिली.प्रमोद गावडे यांनी सांगितले की,सावंतवाडी तालुका सहकारी खरेदी विक्री संघाच्या मुख्य कार्यालयासह माठेवाडी गोदाम मळगाव मळेवाड कास सातार्डा आणि आरोस येथील शाखांमध्येही खते आणि बियाणे उपलब्ध करुन देण्यात आली आहेत.याशिवाय विविध कार्यकारी सहकारी सोसायट्यांच्या मागणीनुसार त्यांनाही खते , बियाणे आणि किटकनाशके पुरवण्यात आली आहेत.
विविध प्रकारच्या बियाण्यांची उपलब्धता !
गतवर्षी जास्त मागणी असलेली रत्नागिरी ८ मसुरी सुवर्णा पंकज आणि शुभांगी या भात बियाण्यांसह यंदा कर्जत २ पंकजा ,घाटी वालय ,कोलम ,मोगरा ,सोनम , रुपाली श्री १०१ वाडा कोलम अराईज ६४४४ अशा विविध प्रकारची भात बियाणे उपलब्ध आहेत.यासोबतच शेतकऱ्यांसाठी आवश्यक खते आणि किटकनाशकेही मोठ्या प्रमाणात उपलब्ध करुन देण्यात आली आहेत.लवकरच तयारीचे आवाहन यंदा मृग नक्षत्रापूर्वीच पावसाने हजेरी लावल्याने शेतकरी लवकरच शेतीच्या मशागतीला सुरुवात करतील असे चित्र आहे या पार्श्वभूमीवर खरेदी विक्री संघाने शेतकऱ्यांना वेळेवर साहित्य मिळावे यासाठी नियोजन केले आहे.असे प्रमोद गावडे यांनी नमूद केले.यामुळे शेतकऱ्यांना खरीप हंगामाची कामे वेळेत पूर्ण करण्यास मदत होणार आहे.
