कुंभोज गाव बंद ठेवून आंदोलनाला गावचा पाठिंबा
कुंभोज प्रतिनिधी
कुंभोज (ता.हातकणंगले) येथील गट नंबर १९०३ या सदर मिळकतीचे एकूण क्षेत्र ४ हेक्टर ०६ आर असे यापैकी अंदाजे ०.८० आर जमीन पूर्वीपासून आजतागायत पडसर व खुली अशा स्थितीत आहे. उर्वरित जागेत गावतलाव अस्तित्वात आहे. सदरची जमीन ही ग्रामपंचायत कुंभोज यांच्या मालकी व कब्जे वहिवाटीची असून प्रस्तुतची मिळकत ग्रामपंचायत कुंभोज यांना दि. ३०/०९/१९५५ साली फेरफार नंबर ५३१९ याप्रमाणे तत्कालीन जिल्हाधिकारी यांच्या आदेशाने कब्जे वहीवाटीत मिळाली आहे. या प्रकरणाची सर्व सातबारे, फेरफार उतारे, आदेश व गावात बाजार भरविण्या संदर्भात सद्यस्थितीला येणाऱ्या समस्या व अडचणी जिल्हाधिकारी यांना निवेदनासहित सादर केलेले आहेत. परंतु आजअखेर या प्रकरणाची जिल्हाधिकारी यांनी दखल घेतली नाही. त्यामुळे कुंभोज ग्रामपंचायत सदस्य जिल्हाधिकारी कार्यालयासमोर उपोषणाला तीन दिवस झाले बसले आहेत. जोपर्यंत कुंभोज ग्रामपंचायतीच्या मागणीला सकारात्मक आदेश पारित करीत नाही तोपर्यंत हे आमरण उपोषण असेच सुरू राहणार असल्याचे सरपंच जयश्री जाधव व उपसरपंच अजित देवमोरे व सर्व ग्रामपंचायत सदस्यांनी सांगितले आहे.
या आमरण उपोषण आंदोलनावेळी जर का यातील १७ ग्रामपंचायत सदस्यांपैकी एकाही ग्रामपंचायत सदस्याच्या जीवितास बरेवाईट झाल्यास ही सर्वस्वी जबाबदारी जिल्हाधिकारी यांचे असेल असे ग्रामपंचायत सदस्यांनी सांगितले आहे. आंदोलनाच्या तिसऱ्या दिवशी उपसरपंच अजित देवमोरे व माजी उपसरपंच दाविद घाटगे यांची तब्येत खालावल्याने त्यांना उपचारासाठी सीपीआरमध्ये हालवण्यात आले आहे तसेच ग्रामपंचायत सदस्य भरतेश्वर भोकरे यांची देखील तब्येत खालावली आहे.परिणामी कुंभोज गाव बंदचे आव्हान करण्यात आले होते.याला ग्रामस्थांनी पाठिंबा दिला,शभर टक्के गाव बंद ठेवण्यात आले,तसेच शेकडो ग्रामस्थांनी जिल्हाधिकारी कार्यालयात कोल्हापूर येथे आंदोलकाना पाठिंबा देऊन शासनाचा निषेध केला.
उपोषण आंदोलनस्थळी सरपंच जयश्री जाधव, उपसरपंच अजित देवमोरे, माजी सरपंच किरण नामे, प्रकाश पाटील, कल्लाप्पाण्णा आवाडे जवाहर कारखान्याचे उपाध्यक्ष बाबासाहेब चौगुले, महावीर चौगुले, अमर पाटील, ग्रामपंचायत सदस्या अरुणादेवी पाटील, शुभांगी माळी, पौर्णिमा भोसले, भारती पोतदार, विशाखा माळी, स्मिता चौगुले, अनिकेत चौगुले, दाविद घाटगे, सदानंद महापुरे, आप्पासो पाटील, अमरजित बंडगर, भरतेश्वर भोकरे, संभाजी मिसाळ, अशोक आरगे, लखन भोसले, धनाजी तिवडे, योहान घाटगे आदी उपस्थित होते..
