महापालिकेच्या भूमिकेमुळे वडगावच्या शेतकऱ्यांमधून समाधान

बेळगाव : मंगाईनगर, वडगाव येथील तलावामध्ये जनावरे धुण्यासाठी व पाणी पिण्यासाठी जागा उपलब्ध करून देण्याची मागणी वडगाव परिसरातील शेतकऱ्यांनी मंगळवारी महापालिकेकडे केली होती. बुधवारी महापालिकेच्या अभियंत्या लक्ष्मी निपाणीकर यांनी तलावाची पाहणी करून जनावरांसाठी काही जागा सोडली जाईल, असे आश्वासन दिले. यामुळे शेतकरी वर्गातून समाधान व्यक्त होत आहे. शेतकऱ्यांनी मागणी करताच महापालिकेच्या अधिकाऱ्यांनी बुधवारी पाहणी केली. शेतकऱ्यांचा प्रश्न लवकर सोडविण्यासाठी येत्या 15 दिवसांत जनावरे सोडण्यासाठी जागा उपलब्ध करून देण्यात येईल, असे आश्वासन शेतकऱ्यांना देण्यात आले. शेतकऱ्यांची गैरसोय होईल, असे कोणतेही काम केले जाणार नसल्याचे त्यांनी स्पष्ट केले. महापालिकेचे अधिकारी मुत्यानावर तसेच पीडब्ल्यूडी विभागाचे परशुराम यासह माजी नगरसेवक मनोहर हलगेकर, हणमंत बाळेकुंद्री, बाळू कित्तूरकर, सुशांत तरळेकर, अप्पू पाखरे, प्रसाद जुवेकर, युवराज नाईक, शशिकांत पाटील यासह इतर शेतकरी उपस्थित होते.