सासष्टी-वेर्णात जोरदार पावसामुळे पडझड

मडगाव : गेल्या दोन दिवसांपासून पडत असलेल्या जोरदार पावसामुळे सासष्टी व वेर्णा भागात पडझड झाली. त्यामुळे मडगाव व वेर्णा अग्नीशामक दलाच्या जवानाना बरीच धावपळ करावी लागली. संततधार पावसामुळे मडगाव येथील मोन्ते हिल येथील निवासी इमारतीजवळील संरक्षक भींत कोसळली. भींतीच्या ढिगाऱ्याखाली 2 दुचाकी गाडल्या गेल्या आहेत. सुदैवाने या घटनेत कोणीही जखमी झालेले नाही. बोर्डा-मडगाव येथे काल गुलमोहरचे झाड वीज वाहिन्या व रस्त्यावर पडल्याने काही वेळ वाहतुकीला त्रास झाला. तसेच या भागातील वीज पुरवठा ही खंडित झाला. मडगाव अग्नीशामक दलाने हे झाड हटविले. धर्मापूर येथे आंब्याचे झाड घरावर पडल्याने घराची सुमारे 20 हजार रूपयांची हानी झाली तर मडगाव अग्नीशामक दलाने सुमारे 70 हजार रूपयांची मालमत्ता वाचविली. ही घटना मंगळवारी सकाळी घडली. फातोर्डा जे जे हॉस्पिटलजवळ एक झाड वीज वाहिन्या तसेच रस्त्यावर पडले. वीज वाहिन्यावर झाड पडल्याने वीज पुरवठा काही वेळासाठी खंडित झाला. हे झाड मडगाव अग्नीशामक दलाने हटविले. ही घटना सकाळी 11.50च्या दरम्यान घडली. फातोर्डा येथे सूनयना हॉटेल जवळ एका झाडाच्या फांद्या तुटून रस्त्यावर लोबंकळू लागल्याने या भागातील वाहतुकीवर परिणाम झाला. स्थानिकांनी अग्नीशामक दलाला कल्पना देऊन झाडाच्या फांद्या हटविण्यात आल्या.