पुणे / प्रतिनिधी :
वीज तोडण्याची भीती घालून सायबर चोरट्यांनी सिंहगड रस्ता भागातील एका नागरिकाला तीन लाख रुपयांना गंडा घातला. या प्रकरणी पोलिसांनी सायबर चोरट्याविरोधात गुन्हा दाखल केला आहे. ५१ वर्षीय व्यक्तीने दत्तवाडी पोलीस ठाण्यात फिर्याद दिली आहे.
थकित वीज बिल न भरल्यास काही वेळात वीज कंपनीतील कर्मचारी तुमचा वीज मीटर काढून नेणार आहेत, असा संदेश सायबर चोरट्याने फिर्यादीला पाठवला होता. चोरट्याने पाठविलेल्या संदेशातील मोबाइल क्रमांकावर तक्रारदाराने संपर्क साधला. चोरट्याने त्यांना एनी डेस्क ॲप डाऊनलोड करण्यास सांगितले. बँक खाते तसेच डेबिट कार्डची गोपनीय माहिती घेऊन चोरट्याने त्यांच्या बँक खात्यातून ऑनलाइन पद्धतीने तीन लाख रुपये लांबविले. खात्यातून पैसे लांबविण्यात आल्याचे लक्षात आल्यानंतर तक्रारदाराने पोलिसांकडे तक्रार दिली. गु्न्हे शाखेचे पोलीस निरीक्षक विजय खोमणे तपास करत आहेत.
अधिक वाचा : गर्भाशय कर्करोगावरील स्वदेशी लस तयार, सीरम उद्या करणार लाँच
गेल्या काही महिन्यांपासून वीज तोडण्याची धमकी देऊन सायबर चोरट्यांकडून नागरिकांना गंडा घालण्याचे प्रकार वाढीस लागले आहेत. महावितरणकडून अधिकृत संदेश पाठविण्यात येतो. चोरटे समाजमाध्यमाचा वापर करुन संदेश पाठवितात. संदेशातील मोबाइल क्रमांक चोरट्यांचा असतो. चोरटे एनी डेस्क ॲप डाऊनलोड करण्यास सांगतात. त्यानंतर बँक खात्यातून पैसे लांबविले जातात. चोरट्यांच्या बतावणीवर विश्वास ठेवू नका, असे आवाहन सायबर पोलिसांकडून करण्यात आले आहे.
