चीनच्या रेस्टॉरंटमध्ये विस्फोट, 31 जणांचा मृत्यू, 7 जखमी

चीन :चीनच्या यिनचुआन शहरात बुधवारी रात्री उशिरा एका रेस्टॉरंटमध्ये विस्फोट झाला आहे. या दुर्घटनेत 31 जणांचा मृत्यू झाला आहे. वायूगळतीमुळे हा स्फोट झाला असून यात 7 जण जखमी झाले आहेत. या जखमींना उपचारासाठी रुग्णालयात  हलविण्यात आले आहे. दुर्घटनेपूर्वी परिसरात लोकांची मोठी गर्दी झाली होती, तेथे डॅगन बोट महोत्सवाची तयारी सुरू होती. यिनचुआन शहर निंग्जिया नावाच्या स्वशासित प्रांताची राजधानी आहे. या प्रांताची लोकसंख्या 68 लाख असून यातील 36 टक्के लोक मुस्लीम आहेत. दुर्घटनेनंतर अग्निशमन दलाने आग विझविण्यासाठी शर्थीचे प्रयत्न करत त्यावर नियंत्रण मिळविल्याचे सांगण्यात आले. रेस्टॉरंटमध्ये विस्फोट झाल्यावर तेथे आग लागली. आगीची तीव्रता अधिक असल्याने जीवितहानी मोठ्या प्रमाणावर झाल्याचे अग्निशमन दलाच्या अधिकाऱ्याकडून सांगण्यात आले. रेस्टॉरंटमध्ये झालेल्या विस्फोटानंतर लोकांच्या सुरक्षेवरून सरकारवर प्रश्न उपस्थित केले आहेत. घनदाट लोकवस्ती असलेल्या भागात सुरक्षित करण्यासाठी योजनांची अंमलबजावणी करण्याची मागणी आता होऊ लागली आहे.