वृत्तसंस्था/ लंडन
नव्या वर्षाच्या सुरुवातीलाच इंग्लंड क्रिकेट संघ भारत दौरा करणार आहे. या दौऱ्यात भारत व इंग्लंड संघात 5 टी 20 व 3 वनडे सामने खेळवले जाणार आहेत. या मालिकेनंतर उभय संघ चॅम्पियन्स ट्रॉफीत खेळताना दिसतील. आगामी भारत दौरा व चॅम्पियन्स ट्रॉफीसाठी रविवारी 15 सदस्यीय इंग्लंड संघाची घोषणा करण्यात आली. अनुभवी जोस बटलरकडे नेतृत्वाची धुरा सोपवण्यात आली असून अनुभवी जो रुटचे वनडे संघात कमबॅक झाले आहे.
वनडेतून निवृत्ती घेतल्यानंतर बेन स्टोक्सने 2023 चा वनडे वर्ल्ड कप खेळण्यासाठी निर्णय बदलला. त्यानंतर त्याने वनडे वर्ल्ड कप स्पर्धेत भाग घेतला तरीही त्याचा संघ विशेष काही करू शकला नाही. बेन स्टोक्सने पुन्हा निवृत्ती जाहीर केली नसली तरी दुखापतीमुळे त्याला भारत दौरा आणि चॅम्पियन्स ट्रॉफीसाठी संघात संधी देण्यात आलेली नाही. चॅम्पियन्स ट्रॉफीपूर्वी इंग्लंडचा संघ भारत दौऱ्यावर असेल, जिथे 22 जानेवारीपासून टी-20 मालिका सुरु होणार आहे. या मालिकेत 5 सामने खेळवले जाणार आहेत. यानंतर, 3 एकदिवसीय सामन्यांची मालिका देखील खेळली जाईल. या दोन मालिकांसाठी इंग्लंडच्या संघात अनुभवी फलंदाज जो रुटचा वनडे संघात तर लेगस्पिनर रेहान अहमदचा टी-20 संघात समावेश करण्यात आला आहे. तर अलीकडील मालिकेतील खराब कामगिरीमुळे विल जॅकला वगळण्यात आले आहे.
चॅम्पियन्स ट्रॉफी व भारताविरुद्ध वनडे मालिकेसाठी इंग्लंड संघ –
जोस बटलर (कर्णधार), जोफ्रा आर्चर, गस ऍटकिन्सन, जेकब बेथेल, हॅरी ब्रूक, ब्रायडन कार्स, बेन डकेट, जेमी ओव्हरटन, जेमी स्मिथ, लियाम लिव्हिंगस्टोन, आदिल रशीद, जो रूट, साकिब महमूद, फिल सॉल्ट, मार्क वुड.
भारताविरुद्ध टी 20 मालिकेसाठी इंग्लंड संघ –
जोस बटलर (कर्णधार), रेहान अहमद, जोफ्रा आर्चर, गस ऍटकिन्सन, जेकब बेथेल, हॅरी ब्रूक, ब्रेडन कार्स, बेन डकेट, जेमी ओव्हरटन, जेमी स्मिथ, लियाम लिव्हिंगस्टोन, आदिल रशीद, साकिब महमूद, फिल सॉल्ट, मार्क वुड.
असा असणार इंग्लंडचा भारत दौरा
इंग्लिश संघ 17 जानेवारी रोजी भारतात येण्यासाठी रवाना होणार आहे. यानंतर उभय संघात 22 जानेवारी ते 2 फेब्रुवारी या दरम्यान पाच सामन्यांची टी 20 मालिका होईल. तसेच वनडे मालिका 6 ते 12 फेब्रुवारी या कलावधीत होणार आहे. यानंतर दोन्ही संघ चॅम्पियन्स ट्रॉफीसाठी रवाना होतील.
