गोगटे कॉमर्स कॉलेजमध्ये रोजगार मेळावा

बेळगाव : केएलएस गोगटे कॉलेज ऑफ कॉमर्सतर्फे नुकतेच रोजगार मेळाव्याचे आयोजन करण्यात आले होते. या मेळाव्यामध्ये 24 हून अधिक कंपन्या सहभागी झाल्या होत्या. 882 विद्यार्थ्यांनी मुलाखती दिल्या असून 200 विद्यार्थ्यांना नोकरीची संधी उपलब्ध करून देण्यात आली आहे. विद्यार्थ्यांना शिक्षण घेतानाच चांगल्या कंपन्यांमध्ये नोकरीची संधी उपलब्ध व्हावी, यासाठी केएलएस गोगटे कॉलेज ऑफ कॉमर्समध्ये रोजगार मेळाव्याचे आयोजन करण्यात आले होते. यामध्ये ऑटोमोबाईल, आयटी, फायनान्स, बीपीओ, एज्युकेशन अँड टेक्नॉलॉजी, रिटेल व कन्सल्टन्सी या विभागात काम करणाऱ्या कंपन्या सहभागी झाल्या होत्या. यावेळी कॉलेजच्या गव्हर्निंग कौन्सिलचे चेअरमन ए. के. तगारे, प्राचार्य एच. एच. विरापूर, बीसीए विभागाचे समन्वयक डॉ. वेणुगोपाल जालीहाळ, सुहास रजपूत, सागर हुलबत्ते यासह इतर उपस्थित होते.