जिल्हास्तरीय रोजगार मेळाव्यातून बेरोजगारांना रोजगार उपलब्ध

बेळगाव : गव्हर्न्मेंट फर्स्ट ग्रेड कॉलेज फॉर वुमनतर्फे बुधवारी जिल्हास्तरीय रोजगार मेळाव्याचे आयोजन करण्यात आले होते. यामध्ये 750 हून अधिक तरुणांना नोकरीची संधी उपलब्ध करून देण्यात आली. अनेक नामांकित औद्योगिक कंपन्यांनी यामध्ये सहभाग घेतला होता. रोजगार मेळाव्यासाठी 1070 उमेदवारांनी ऑनलाईन अर्ज केले होते. त्यापैकी 900 उमेदवारांनी सहभाग घेतला. मुलाखती घेऊन 717 उमेदवारांना नोकरीची संधी देण्यात आली. होंडा, टाटा इलेक्ट्रॉनिक्स, फॉक्सकॉन, व्हिस्ट्रान यांच्यासह बेळगावमधील स्थानिक कंपन्या सहभागी झाल्या होत्या. दहावी, बारावी, आयटीआय, पदवी व पदव्युत्तर विद्यार्थ्यांना रोजगार मेळाव्यातून नोकरीच्या संधी उपलब्ध झाल्या. रोजगार मेळाव्याचे उद्घाटन प्लेसमेंट विभागाचे समन्वयक डॉ. शमसुद्दीन नदाफ यांच्या हस्ते झाले. यावेळी डॉ. एन. आर. पाटील, डॉ. रमेश मांगलेकर, डॉ. विजयालक्ष्मी नायक, प्रकाश मबनुर यांच्यासह इतर उपस्थित होते.