वडगाव, शहापूर स्मशानभूमीतील गैरसोयी दूर करा

बेळगाव : शहापूर आणि वडगाव स्मशानभूमीमध्ये गैरसोयी अधिक झाल्या आहेत. त्या दूर कराव्यात अशी मागणी महापालिकेच्या अभियंत्या लक्ष्मी निपाणीकर यांच्याकडे नगरसेवक रवी साळुंखे यांनी केली. याचबरोबर खासबाग येथे नाल्यावर स्लॅब नसल्यामुळे ते धोकादायक असून तातडीने तेही काम पूर्ण करावे, अशी विनंती त्यांनी यावेळी केली आहे. शहापूर स्मशानभूमीमध्ये बसण्यासाठी असलेली आस्थापने खराब झाली आहेत. फरशी काही ठिकाणी फुटली आहे. अंत्यविधीसाठी आलेल्या नागरिकांना उभे राहण्यासाठी शेडही नाही. त्यामुळे समस्या निर्माण झाली असून त्याची दुरुस्ती करावी, असे त्यांनी सांगितले. वडगाव स्मशानभूमीचीही अवस्था दयनीय झाली आहे. त्याचीही तातडीने दुरुस्ती करावी, त्या ठिकाणी आणखी शेगड्या बसवाव्यात. याचबराब्sार शेडची उभारणीही करावी, असे त्यांनी यावेळी सांगितले. अभियंत्या लक्ष्मी निपाणीकर यांनी तातडीने संबंधित अधिकाऱ्यांना सूचना करून त्याचा आराखडा तयार करावा, असे सांगितले. नाल्याबाबत आराखडा तयार असून ऑक्टोबरदरम्यान काम करण्याचे आश्वासन दिले. स्मशानभूमीतील दुरुस्तीचे कामही करण्याचे आश्वासन त्यांनी दिले. यावेळी सिद्धार्थ भातकांडे उपस्थित होते.