शिवाजीनगर, श्रीनगर येथील वीजखांब बदलले

बेळगाव : श्रीनगर येथील नागरिकांच्या मागणीनुसार धोकादायक वीजखांब हेस्कॉमकडून हटविण्यात आले. चन्नम्मा सोसायटी परिसरात जुने वीजखांब काढून त्याठिकाणी काँक्रीटचे मोठे वीज खांब उभारण्यात आले आहेत. एकूण 3 ठिकाणी असे विद्युत खांब उभारण्यात आल्याने रहिवाशांमधून समाधान व्यक्त होत आहे. गणेशोत्सवापूर्वी हेस्कॉमकडून दुरुस्तीचे काम हाती घेण्यात आले आहे. याचाच एक भाग म्हणून शिवाजीनगर तिसरी गल्ली येथील जुन्या वीजवाहिन्या बदलून त्याठिकाणी एलटीएबी केबल घालण्यात आल्या आहेत. यामुळे गणेशोत्सव मंडळाचा मंडप घालताना अडचणी दूर होणार आहेत. हेस्कॉमच्या सूचनेनुसार गणेशोत्सव मंडळानी विजेसंदर्भातील तक्रारी हेस्कॉमला दिल्या होत्या. त्यानुसार दुरुस्ती केली जात आहे. श्रीनगर परिसरात वसाहत वाढली तरी जुनेच विद्युत खांब असल्याने समस्या वाढल्या होत्या. त्या दूर करण्यासाठी जुने खांब बदलून नवीन काँक्रीटचा एकच खांब बसविण्यात आला आहे. त्याबरोबर विरभद्रनगर, शिवाजीनगर या भागातील वीज खांब बदलण्यात आले. तसेच वीज वाहिन्यांची दुरुस्ती केली आहे.