पणजी : पणजी महानगर पालिकेची महापौर व उपमहापौर निवडणूक गुरुवारी दि. 30 मार्च रोजी घेण्यात येणार आहे. विद्यमान महापौर रोहित मोन्सेरात हे त्यासाठी पुन्हा एकदा अर्ज करणार असल्याचे वृत्त हाती आले असून आता तिसऱ्यांदा महापौर होतील, असा अंदाज व्यक्त करण्यात येत आहे. त्यांना सांगितले की, आपण त्या पदासाठी इच्छुक असून पुन्हा अर्ज करणार आहे. उपमहापौर कोण होणार? हे सांगण्यास मात्र त्यांनी नकार दिला. त्यासाठी अद्याप कोणी इच्छुक नाही व त्या पदाकरीता कोणी दावाही केलेला नाही. निवडणूक प्रक्रिया सुरू झाली की अर्ज येतील तेव्हा उपमहापौर होण्याची कोणाची इच्छा आहे ते कळलेच, मोन्सेरात यांनी नमूद केले. पणजी महानगर पालिकेवर पणजीचे आमदार तथा महसूलमंत्री बाबूश मोन्सेरात यांची एक हाती सत्ता आणि वर्चस्व असून 2021मध्ये झालेल्या मनपा निवडणुकीत एकूण 30 पैकी 25 जागा त्यांच्या गटाने जिंकल्या होत्या. त्यावेळी रोहित मोन्सेरात हे महापौर तर वंसत आगशीकर हे उपमहापौर म्हणून निवडून आले होते. गेल्यावर्षी 2022 मध्ये मोन्सेरात पुन्हा महापौर झाले तर संजीव नाईक हे उपमहापौर बनले आता 2023मधील निवडणुकीत महापौर तेच कायम राहतील आणि उपमहापौर बदलतील, अशी चिन्हे दिसत आहेत. पणजी मनपा कायद्यानुसार दरवर्षी महापौर व उपमहापौर निवडणूक घेण्यात येते. मंत्री मोन्सेरात ठरवतील तेच उपमहापौर होणार, असे सूत्रांनी सांगितले.
Tarun Bharat Portal
Amit Kulkarni a versatile content writer, scriptwriter, and content producer at Tarun Bharat Media. Specializes in sports news, local news entertainment, national news and astrology content. His captivating storytelling and deep industry knowledge make him an expert in crafting engaging narratives.
Related Posts
