शिक्षणमंत्री मधु बंगारप्पांची सरकारी शाळांना भेट

बेळगाव : सरकारी शाळांमधील गुणवत्ता पाहण्यासाठी शिक्षणमंत्री मधु बंगारप्पा यांनी बुधवारी शहरातील विविध सरकारी शाळांना भेटी दिल्या. यावेळी त्यांनी विद्यार्थ्यांशी संवाद साधत त्यांच्या समस्या जाणून घेतल्या. खंजर गल्ली येथील कन्या शाळेमध्ये नवीन इमारत बांधण्याचे आश्वासन त्यांनी यावेळी दिले. अधिवेशनासाठी बेळगावमध्ये असणाऱ्या शिक्षणमंत्र्यांनी बुधवारी येथील खंजर गल्ली, वीरभद्रनगर व सरदार्स हायस्कूलमधील सरकारी शाळांची पाहणी केली. बेळगाव उत्तरचे आमदार राजू सेठ यांनी बंगारप्पा यांना बेळगाव परिसरातील शाळांची माहिती दिली. ऊर्दू, कन्नड व मराठी माध्यमाच्या सरकारी शाळांमध्ये दिल्या जाणाऱ्या गुणवत्तापूर्ण शिक्षणाची माहिती त्यांनी दिली. यावेळी बोलताना राजू सेठ म्हणाले, खासगी शाळांच्या तोडीस तोड सरकारी शाळा चालविल्या जात आहेत. शहराच्या मध्यवर्ती भागात असणाऱ्या सरकारी शाळांमध्ये विद्यार्थ्यांची कमतरता नाही. त्यामुळे यापुढील काळातही शिक्षकांनी अधिक जोमाने काम करावे. सरकारकडून सर्व सोयीसुविधा उपलब्ध करून देण्यासाठी आपण प्रयत्नशील असल्याचे त्यांनी सांगितले. यावेळी शहर गटशिक्षणाधिकारी लिलावती हिरेमठ यांच्यासह शिक्षक व पालक उपस्थित होते.