ऑनलाईन टीम / तरुण भारत :
राष्ट्रवादीचे नेते आणि माजी मंत्री नवाब मलिक (Nawab Malik) यांची संपत्ती जप्त करण्यास ईडीला परवानगी मिळाली आहे. त्यामुळे मलिक आणि त्यांच्या नातेवाईकांच्या 8 संपत्तींवर टाच येणार आहे. यामध्ये मुंबईतील गोवावाला कंपाऊंडमधील जमिनीचा एक भाग, कुर्ला पश्चिमेला तीन फ्लॅट, वांदे पश्चिम येथील दोन फ्लॅट आणि उस्मानाबाद जिल्ह्यातील 147 एकर शेतजमिनीचा समावेश आहे.
ईडीने 23 फेबुवारीला मलिकांना अटक केली आहे. अंडरवर्ल्ड डॉन दाऊद इब्राहीम याच्याविरुद्ध दाखल असलेल्या गुन्ह्यात ही कारवाई करण्यात आली होती. लँड डीलशी संबंधित हे प्रकरण असून, टेरर फंडिंग आणि मनी लाँड्रिंगचा आरोप मलिक यांच्यावर करण्यात आला आहे. अटकेनंतर ईडीने त्यांच्या मालमत्तांची माहिती गोळा केली होती. सातत्याने त्यांची चौकशी सुरू होती. आता अधिनिर्णय प्राधिकरणाने मलिकांच्या आठ मालमत्ता जप्त करण्यास ईडीला परवानगी दिली आहे.
अधिक वाचा : स्वतंत्र भारताचे पहिले मतदार श्याम नेगी यांचे निधन
मलिक सध्या न्यायलयीन कोठडीत असून खासगी रुग्णालयात उपचार घेत आहेत. संपत्ती जप्त करण्यास परवानगी मिळाल्याने ईडीचे अधिकारी कायदेशीर सल्लामसलत करत आहेत.
