कोल्हापूर :
कोल्हापुरातील उच्च शिक्षण विभागीय सहसंचालक कार्यालयातील ई–ऑफिस प्रणाली बंद असून कार्यालयातील टपालांची नोंदवहीत नोंद नसणे, प्रस्ताव प्रलंबित, दैनंदिन जमाखर्चाची रोखवहित नोंद न करणे यासह सात विषयांमध्ये त्रुटी आढळल्याने उच्च व तंत्र शिक्षण कोल्हापूर विभागीय सहसंचालक डॉ. धनराज नाकाडे यांना राज्याच्या उच्च व तंत्र शिक्षण विभागाचे संचालक डॉ. शैलेंद्र देवळाणकर यांनी नोटीस बजावली आहे.
डॉ.देवळाणकर यांनी 3 जानेवारीला कोल्हापूर विभागीय सहसंचालक कार्यालयाला भेट देऊन आढावा घेतला होता. यात त्यांना तपासणीच्या अनुषंगाने प्रशासकीय, वित्तीय बाबी प्रलंबित असल्याचे आढळून आल्याने त्यांनी डॉ. नाकाडे यांना नोटीस दिली. शासनाच्या 18 जुलै 2023 च्या परिपत्रकानुसार कोणत्याही परिस्थितीत नस्तीची कार्यवाही ऑफलाईन न करता केवळ ई–ऑफिस प्रणालीद्वारे कामकाज करण्याच्या सूचना दिल्या होत्या. उच्च शिक्षण विभागीय सहसंचालक कार्यालयात ई–ऑफिस प्रणाली कार्यान्वित होती. मात्र, डॉ. नाकाडे हे 25 सप्टेंबर 2024 रोजी रुजू झाल्यापासून या कार्यालयातील ई–ऑफिस प्रणाली सुरु नाही. ही बाब शिस्तीचा भंग करणारी असल्याचे या नोटिशीत म्हंटले आहे. झिरो पेन्डसी मोहीम सुरु असताना अशासकीय अनुदानित महाविद्यालयांच्या शिक्षकीय पदभरती संगणक प्रणालीमध्ये नोव्हेंबर व डिसेंबर 2024 मधील तीन प्रस्ताव अद्यापही कार्यवाहीविना प्रलंबित ठेवले.
- संगणक जुने असल्याने अडचणी
कार्यालयातील संगणक जुने असल्याने ई–ऑफिस प्रणाली सुरु करता आली नव्हती. नव्या संगणकांची मागणी केली असून ते उपलब्ध झाल्यानंतर ही प्रणाली सुरु करणार आहे. याची माहिती वरिष्ठांना दिली आहे.
डॉ. धनराज नाकाडे (विभागीय सहसंचालक, उच्च व तंत्र शिक्षण विभाग, कोल्हापूर)
